صحيح كتير مننا محضرش فترة زمن الفن الجميل ونجومها، لكن دايمًا بنحن للوقت ده وواحدة من أمنيات الجيل الجديدة الرجوع بالزمن لوراء، علشان نشوف حياة نجوم زمان كانت عامله إزاي؟، ده بالظبط اللي هتعرفه لما تقرأ كتاب "قصة امرأة حرة" للكاتبة الصحفية هبة محمد على، واللي بتحكي فيه قصة حياة الفنانة "لبنى عبد العزيز".

تعالوا نقلب صفحات الكتاب ونعرف بيقولنا إيه:

1- مؤلفة الكتاب أكدت إن رغم تصنيفه ضمن كتب السيرة الذاتية، لكنه بيتكلم أكتر حياتها الشخصية من ولادتها لحد النهارده، وبيبدأ بالنشأة والأسرة مرورًا بعملها في الإذاعة والصحافة ووصولًا لدخولها مجال التمثيل.

2- جوه الكتاب حكاوي كتير عن سنين الغربة اللي عاشتها لبنى في الولايات المتحدة الأمريكية مع زوجها الثاني إسماعيل برادة، وهناك أنجبت بناتها وبعدها رجعت واستقرت تاني في بلدها مصر، بجانب فترة عودتها القصيرة للفن ومواكبتها ثورة 30 يونيو.

3- هنعيش كمان مواقف مختلفة جمعت لبنى بنجوم الفن والأدب والسياسية في مصر، سواء اللي اشتغلت معاهم أو اللي قابلتهم حسب الظروف، ودي بتحكيها لبنى بنفسها لأول مرة، كل ده هنشوفه موثق بصور نادرة من أرشيفها الخاص.

4- الكتاب بيرد على شائعات كتير طالت النجمة لبنى عبد العزيز، وكمان بيتكلم عن  تجاربها الشخصية ولحظات الفشل اللي مرت بيها على مدار سنين حياتها.

5- مقدمة الكتاب بتضم شهادات عن لبنى بقلم الكاتب الصحفي مفيد فوزي والفنان القدير سمير صبري وأحمد عبد القدوس" ابن الكاتب الكبير "إحسان عبد القدوس " مكتشفها الأول وأول حد وضع قدمها على طريق النجومية.