أوقات كتير موسم دراما رمضان، بيكون فرصة لتعريفنا بمواهب جديدة، بس السنة دي إحنا قدام فنان يمكن مش أول مرة نشوفه على الشاشة، لكنه عمل حالة تعتبر إعادة اكتشاف لموهبته من جديد، خاصة إنه قدم دور مركب وحساس في مسلسل "القاهرة كابول"، حسني شتا الضابط والإرهابي، يلا نعرف كواليس أكتر عن الشخصية من خلال أبرز 5 تصريحات إعلامية للفنان حسني شتا.

1- أول مشهد قدمته في المسلسل، ظهرت فيه مع الفنان خالد الصاوي بشخصية الإرهابي، المشاهد بينا كانت ممتعة وكأننا بنلعب "بينج بونج"، ودي ثاني مرة اشتغل معاه، ودايمًا كان بيشكر في أدائي قدام الحاضرين، الأمر اللي بيجعلني فخور بأي عمل بيجمعنا سوا.

2- ذاكرت شخصية "وحيد" الإرهابي كويس، وكنت عايز الناس تصدقه علشان يتفاجئوا بعد كده لما يعرفوا إنه أصلًا ظابط، وفعلًا اتفرجت على فيديوهات كتير للمتطرفين، وقدرت أعرف طريقة تفكيرهم وشكل حياتهم.

3- اندمجت جدًا مع شخصية الإرهابي لدرجة إن والدتي وهي بتتفرج عليا اتخضت، لكن في نفس الوقت بعرف أفصل بين الشخصيات اللي بجسدها وبين حياتي الشخصية.

4- مش شرط إن المسلسلات الرمضانية هي اللي بتتشاف أكتر، وعلى سبيل المثال شاركت في مسلسل "الأب الروحي" واتعرض خارج موسم رمضان، ومع ذلك نجح نجاح كبير.

5- مساحة الدور مابتفرقش معايا، بهتم أكتر بقيمة الشخصية والرسالة أو الهدف اللي عاوزة توصله للجمهور.