إعلانات رمضان السنة دي غير، شوفنا فيها نجوم بقالهم سنين وسنين غايبين عننا، وشوفنا كمان نجوم اتجمعوا سوا في نفس الكادر، خطفوا قلوبنا في كام ثانية، وإدونا جرعة بهجة وفرفشة كنا مستنينها.
وإحنا في "كلام القاهرة"، تواصلنا مع واحد من أهم مخرجي الإعلانات في مصر، واللي أخرج إعلان الفنانة نانسي عجرم وأمير كرارة "أقوى وبكتير"، وكمان إعلان "فريش وفرافيش" لدينا الشربيني وروبي، واللي كلمنا عن أهم كواليس العملين.
وعن الإعلان الخاص بشبكة الاتصالات، قال "مهدي": "حبيت أوصل للناس فكرة قوة الشبكة، بشكل رومانتيك كوميدي، وهنا اخترت أمير كرارة، اللي عمل توليفة حلوة، ما بين قوته الجسدية ورقتة قدام نانسي في نفس الوقت، وده جانب تمثيلي محادش شافه فيه قبل كده، وأنا براهن عليه".
وقالنا كمان، إنه ماكنش متخيل "إن نانسي جدعة كده، وده كان واضح عليها في التصوير، صورت أكتر من 18 ساعة ونص، من غير ما تشتكي وضحكتها اللي شوفناها في الإعلان مافارقتش وشها، ده غير إنها أكتر فنانة تليق على الإعلان لإنها معروفة برقتها وصوتها الناعم وناس كتير بتحبها، بجانب الكيميا البصرية اللي بتجمع بينها وبين أمير".
View this post on Instagram
وكشف "مهدي" إن ديكور الإعلان حقيقي وتم بنائه بالكامل، علشان يوصل للمشاهد جو المغامرة والأساطير الحقيقي، بالإضافة إلى أن ملابس الفنانين اتحضرت باهتمام وعناية كبيرة جدًا.
وعن ظروف التصوير بأعداد كبيرة في ظل أزمة فيروس كورونا، قال: "كل الكاست عمل مسحة قبل تصوير الإعلان، وأنا من المخرجين اللي مبيهزروش في الموضوع ده، وكل العاملين كانوا ملتزمين بلبس الماسكات طول فترة التصوير".
أما عن تصوير إعلان النجمتين دينا الشربيني وروبي، فقال إن الإعلان أصلًا كان هيتصور بنجوم تانين، لكنه ماكنتش شايف فيهم الكريزما دي، علشان كده اتفق مع شركة الإنتاج وصاحبها محمد السعدي، إنه يتنفذ بـ دينا وروبي أفضل، ورحب جدًا بالفكرة.
ووضح كمان إنهم أصحاب في الأساس، ومافيش بينهم أي مشاعر سلبية، بالعكس، كل واحدة فيهم عارفة إنها في حتة لوحدها، ومافيش واحدة منهم علقت على ظهور التانية أكتر زي ما بنشوف، كمان دمهم خفيف وروحهم حلوة وده كان باين على الشاشة حقيقي ومن غير تمثيل، وقال كمان إن الإعلان اتصور في يومين بس، وإنه حب يعمل رؤية بصرية جديدة للمشاهد، بعيدة عن فكرة تصدير غسالة أو تلاجة.
