في اليومين اللي فاتوا انتشر مقطع فيديو على السوشيال ميديا، ظهر خلاله سائح آسيوي بيتعرض للتنمر والسخرية وسط الناس. والتنمر ده كان من سواق سيارة اللي كان بيستقلها السائح، وعدد من المواطنين على كوبري الدائري.
الحكاية بدأت بإن السائق حط منديل على وشه، باعتبار إن المواطن الآسيوي اللي معاه مصاب بالفعل. وتفاعل معاه بعض المواطنين من السيارات المجاورة، وطلبوا منه ينزله بدل ما يتعدي منه. السواق بالفعل نزله في وسط الطريق، والكل سابه بدون مساعدة.
مقطع الفيديو صدم كتير من رواد السوشيال ميديا، واتهموا كل اللي ظهروا في الفيديو بالعنصرية. بما فيهم اللي صوره. خصوصًا بعد ظهور السائح في حالة رعب وتخبط، نتيجة مهاجمة كل الموجودين له، من غير سبب منطقي.
الموضوع لفت انتباه عدد من النجوم والفنانين برضو، اللي شافوا الواقعة مهينة بشكل كبير. وأعلنوا دعمهم الكامل لضحية الواقعة، وكان منهم:
- أيمن بهجت قمر "بعتذرلك من كل قلبي"
قدم الكاتب إيمن بهجت قمر اعتذار للسائح بالنيابة عن كل المصريين، وقال إن المصريين مش كلهم كده. مصر فيها شباب زي الفل وفيها نماذج عكس كده.
- أحمد السقا "لا للتنمر ولا للعنصرية"
من خلال حسابه على إنستجرام، عبر الفنان أحمد السقا عن إنزعاجه من الموقف. وأكد إن المصريين أكبر وأجدع من كده بكتير. وطلب من جمهوره إنهم يوصلوه بالسائح في حالة معرفتهم بمكان تواجده.
فعلًا الموضوع كان صادم ومخزي بشكل كبير. أولًا لإن دي بالفعل عنصرية حقيقية، مانرضاش إنها تكون فينا. وكمان حتى لو هو شخص مصاب، فالفيروس ممكن يصيب أي شخص. سواء صيني، مصري، سعودي، أو أي جنسية تانية. ومفيش داعي نعامل الناس بطريقة، مانقبلهاش على نفسنا لو كنا مكانهم.
