في خطوة مفاجأة، قرر الكاتب والشاعر الغنائي أيمن بهجت قمر، اعتزال تأليف الأغاني والاكتفاء بالإنتاج. وقال من خلال بوست على فيسبوك، إنه هيتفرغ لكتابة الأعمال الدرامية فقط. وده بسبب الضغط  والتوتر اللي اتعرض له على مدار 28 سنة، من ساعة ما بدأ يكتب أغاني.

القرار كان صادم للفناين وصناع الموسيقى، وكمان جمهور "قمر". وبدأ الفنانين بمحاولة إقناعه بالتراجع، إما من خلال البرامج التليفزيونية، أو من خلال السوشيال ميديا.

تعالوا نشوف جزء من ردود فعل الفنانين والموسيقين على اعتزال أيمن بهجت قمر:

عمرو دياب: "من أحسن الشعراء اللي جُم في الـ 20 سنة اللي فاتو".

أكد الهضبة إن أيمن من أحسن الشعراء في المجال، خلال الـ 20 سنة اللي فاتوا. وقال إنه لو عايز يهدي شويه، مايهداش في مجال الغناء لإنه مؤثر جدًا.

أحمد السعدني: "انت حر إنك ترجع في الكلام ده بكرة الصبح".

كتب "السعدني" تعليق بيساند فيه "قمر" على أي قرار ياخده، طالما هيكون مريح بالنسبة له. وأكد إن جمهوره بيحبه، ومعاه في أي قرار.

بهاء الدين محمد "هو برضو القمر ممكن يسيب الليل؟"

نشر الشاعر بهاء الدين محمد بوست على فيسبوك. عبارة عن أبيات شعرية بيحاول بيها يقنع "قمر" بالتراجع عن الاعتزال. وقاله: "حالة وهتعدي عشان انت قادر تشيل.. هو برضو القمر ممكن يسيب الليل؟".

بلال سرور: "لسه عندك كتير".

طلب الملحن بلال سرور من "قمر" إنه ياخد بريك ويرجع تاني. علشان المرحلة دي متحاجة لوجوده.

تامر حسين: "مش بمزاجك".

علق الشاعر تامر حسين، على بوست اعتزال أيمن بهجت قمر. ووضح إن النجاح بينسي التعب والضغوط النفسية. وإن مش بمزاجه يعتزل، لإن جمهوره له حق عليه. خصوصًا إنه سايب علامة في قلوب كل اللي بيحبوه.

إحنا كمان بنتمنى أيمن بهجت قمر يرجع في قراره وتكون سحابة وهتعدي.