حالة من تضارب التصريحات شهدها موقف الفنان لطفي لبيب من التمثيل، خلال الأيام اللي فاتت، خاصة بعد ظهوره الأخير في حفل تكريمه من قبل وزيرة الثقافة الدكتورة إيناس عبدالدايم، وعلامات المرض واضحة عليه، نتيجة إصابته بجلطة أثرت على الجانب الشمال من جسمه، وده سبب غيابه طول الفترة دي.

اترددت شائعات كتير بتقول إن "لبيب"، خلاص هيعتزل التمثيل نهائيًا، منهم تصريح قال فيه :"أنا راضي بكل ما أراده الله.. مش قادر أمثل تاني ومش قادر أقف على رجلي، لكن أنا بعشق الفن وهفضل متابع له حتى لو حالتي الصحية خلتني مش قادر على التمثيل".

بجانب ده، الفنانة نجلاء بدر، كمان نشرت على حساباتها بالسوشيال ميديا، كلام معناه إن "لبيب"، ما اعتزلش التمثيل ولا حاجة، وإنها مستغربة من الشائعات دي، خاصة إنه بيمثل معاها اليومين دول في مسلسل اسمه "ويبقى الآثر".

الحقيقة إن الفنان لطفى لبيب حسم كل الجدل ده، وقال في مداخلة هاتفية مع برنامج "مساء دي إم سي" إن مافيش ممثل بيعتزل في الدنيا.. إنما فيه ممثل حسب ظروفه الصحية قادر يمثل أو لأ.. وعادي أصبت بجلطة وظروفي الصحية ماتخلينيش أقدر أمثل 20 ساعة".

ووضح: "كنت بشتغل 20 ساعة في اليوم ودلوقتي مابقدرش اشتغل الوقت ده.. بشتغل لو جالي شغل ومخرج يتفهم ويراعي ظروفي الصحية.. وبحب الناس وجمهوري.. كلمة اعتزال لا أعنيها بالمعنى المطلق وخرجت مني كده، أنا كويس وبعمل علاج طبيعي.. وبيحصل تحسن بس ماعدتش زي زمان".

سلامتك يا فنان!