كعادة كل سنة، بتجيب ورقة وقلم وتكتب أهدافك اللي عايز تحققها في السنة الجديدة. كالعادة برضو بتيجي سنة وتروح سنة، وانت زي ما انت ماتنكرش. وأهدافك بتاعت 2010 لسه أصلًا ماشافتش النور. إحنا بقى علشان حاسين بيك وعارفين مشكلتك، هنقول لك على طريقة مضمونة 100% تحقق بيها أهدافك في 2020:
1- ماتحددش أهداف أصلًا
لا هتروح الجيم علشان تخس، ولا هتاخد الكورس اللي بتخطط له. فبلاش تزود الضغط على نفسك، وخليها كده ماشية بالبركة. وهتعرف قيمة ده لما تنجز حاجة من غير تخطيط، هتحس فعلًا الدنيا بتضحك لك.
2- ماتستناش زيادة مرتب
ماتستناش الترقية ولا زيادة المرتب، احمد ربنا إنك شغال. غيرك مش لاقي شغل ويتمنى وظيفتك. وانت عارف إن الرد على طلب الزيادة بيكون "أديك شايف حال البلد". فكفاية أحلام وردية، ودور على شغل جنب شغلك.
3- نام وأنتخ
السنة الجديدة بتبدأ في عز البرد، وطبعًا محدش هيحتويك أكتر من سريرك وبطانيتك. ولو على الشغل مش هيطير، ولا اقتصاد البلد هيتأثر. وكده كده قولنا مفيش زيادات، يبقى صحتك وراحتك بالدنيا.
4- ماتشغلش بالك بالـ saved items
حساباتك على السوشيال ميديا وأولهم فيسبوك، مليانين "saved items" من آلاف السنين. فأكيد اللي كنت محتاجه مابقتش محتاجه. وأكيد هتزودهم بحاجات وتنساها برضو. فامتقلقش بخصوصهم لأن عمرك ما هتفتحهم في الوقت المناسب.
5- انسى الخروجة إياها
عارف انت خروجتك مع أصحابك اللي بتفضل في مرحلة التخطيط بس دي؟ ده مشغول وده عنده شغل وده خالته بتغسل. انسى يا معلم لأن الموضوع مش هيتغير، وهتفضل الخروجة في مرحلة التنفيذ. لحد ما واحد منكم يتجوز ساعتها تقدروا تتقابلوا وتشوفوا بعض.
كل سنة وانت لسه عايز تحقق كل اللي متحققش من 2010
