لو بتحب المغامرة، وعندك شغف تتسلق مرتفعات وصخور وتمشي على الجسور.. دير الأنبا سمعان الخراز في المقطم بيوفر لك منطقة كاملة اسمها High Ropes. ودي فيها 4 ألعاب مغامرة تقدر تلعبهم، وآمنين جدًا جدًا. بس قبل ما تروح لازم تتصل بماريو مسئول اللعب، علشان تعرف موجود ولا لأ. رقم تليفونه: 01200140662.

تقدر تلعب كل الألعاب بـ 300 جنيه. أو كل لعبة لوحدها بسعرها. وماتقلقش هيكون لك لبس سيفتي يحميك.

1- Zip Line

اللعبة دي عبارة عن برج بتطلع عليه وتتربط بحبل، بتتزحلق وانت شايف منطقة المقطم بالكامل حواليك. لازم تكون ثقتك بنفسك كبيرة، علشان تعرف تستمتع. وخلي بالك إن اللعبة لها توقيت محدد، لازم قبل الغروب. علشان تعرف تستمتع بالمناظر من الجو. وسعرها 75 جنيه.

2- تسلق الصخور

دي بقى محتاجة طاقة وفيتنس عالي، علشان بتبذل مجهود فيها بجد. بتطلع لارتفاع عالي جدًا، تضرب الجرس وتنزل. طبعًا بتكون متأمن ومربوط، علشان لو إيديك فلتت ماتقعش. وكمان فيه شخص بيكون مربوط معاك، علشان عملية التوازن. وسعر اللعبة 50 جنيه.

3- الأحبال المنخفضة 

متعة إنك تمشي على حبال وجسر، ولازم تحافظ على توازنك علشان ماتقعش. ماتقلقش لو اتزحلقت، بتنزل على حبل تاني يخليك تقدر تكمل المشي على الحبال. وسعر اللعبة 75 جنيه.

4- لعبة الإثارة

دي بقى أصعب لعبة وأمتعهم. فيها بتكون على ارتفاع عالي جدًا، وبتتشعبط في الحبال. وتقعد تتحرك من حبل لحبل كأنك طرزان في الادغال. نسبة الأمان فيها 100%. وسعرها 100 جنيه.

دي صفحتهم على فيسبوك.