في مفاجأة للكل، طرح الفنان الشعبي حسن شاكوش، فيديو كليب أغنيته الجديدة "حبيبتي افتحي شباكك أنا جيت"، وشاركته الفنانة ياسمين رئيس كموديل وغنت معاه جزء بسيط كمان، ناس كتير ماكنتش متوقعة الميكس ده خالص، علشان كده حصلت حالة جدل على السوشيال ميديا.

بالتأكيد الأغنية عجبت بعض الناس، لكن في المقابل فيه ناس تانيين اعترضوا على الأغنية، وعلى مشاركة "ياسمين" فيها، فقولنا دي فرصة نتخيل مع بعض كام سيناريو، ممكن يكونوا هم السبب ورا مشاركتها في الكليب:

1 - مزنوقة في قرشين والصيف داخل علينا، يعني محتاجة تشتري صن بلوك وشوية زيوت علشان التان، وطبعًا مافيش أحسن من الفرصة دي للم شوية فلوس.

2- جوزها مخرج الكليب كان محتاج موديل فقالت أنا أولى، ناس كتير مش عارفين إن ياسمين رئيس والمخرج المعروف هادي الباجوري متجوزين ومخلفين ولد اسمه "سليم"، المهم جوزها وبعين المخرج شاف إن ياسمين أنسب واحدة للأغنية دي، وده اللي هتفهموه أكتر في النقطتين الجايين.

3- الجو الشعبي لسه مأثر عليها من بعد مسلسل "ملوك الجدعنة"، وارد جدًا إنها حبت الموضوع، خاصة إن اللوك الشعبي كان لايق عليها وحسينا إنها بنت بلد بجد، فقالت لنفسها سمية الخشاب مش أحسن مني. "هتعرفوا إشمعنى سمية قريب".

4- كان نفسها تطلع موديل بس مجموعها ماجابش، من كام سنة كده، شوفنا ياسمين رئيس في فيديو كليب "مفتقد الحبيبة" لفريق شارموفرز، فمش بعيد لما شافت تحضيرات الكليب قدامها، استحضرت روح الموديل اللي جواها وقالت لنفسها قومي يا "ياسمين" فرجي الناس على مواهبك المدفونة.

5- بتدور على الشهرة والتريند اللي مجنن بعض الفنانين، مانقدرش ننكر إن حسن شاكوش بقى من أهم المطربيين الشعبيين اللي على الساحة في وقتنا ده، وأي أغنية له لازم تفرقع وتملى الأفراح وفيديوهات التيك توك، وده سبب مش بطال برضه.

تختاروا إيه من الإجابات اللي فوق؟ ولا عندكم إجابة تخيلية مختلفة؟