مش كل الناس تعرف إن ياسمين صبري بدأت حياتها كمراسلة لقناة فضائية وبعدين اشتغلت موديل إعلانات، لحد ما ظهرت في برنامج "خطوات الشيطان" مع الداعية معز مسعود في رمضان 2013، خطفت عيون ناس كتير واعتبروها من أجمل الوجوه وقتها، وسنة ورا سنة دخلت عالم الدراما وكمان السينما.

ومن وجهة نظر البعض، ياسمين مش بس محظوظة بجمالها المميز بين فنانات جيلها، لكن كمان جوازها من رجل الأعمال الشهير أحمد أبوهشيمة لمدة سنتين، وده الخبر اللي كان عامل قلق، ويمكن لاحظنا هجوم بعض الناس عليها على السوشيال ميديا من أول الجوازة لحد دلوقتي. لكن ليه ياسمين دائمًا بتتسبب في كل الجدل ده على السوشيل ميديا؟

السطور الجاية مجرد محاولة للإجابة:

بتستعرض ثروتها

صور استمتاعها بحياتها الشخصية خصوصًا بعد زواجها كانت محور اهتمام كبير، يعني ولا صورة بتنزلها ياسمين إلا وكان بيتم تحليل كل تفصيلة فيها، صورها في الطائرة أو اليخت الخاص بزوجها وهي رايحة إيطاليا أو راجعة من اليونان، بعض الناس كانت بتشوف فيها نوع من الاستعراض والتباهي، بالذات وقت أزمة كورونا والحجر الصحي والمشاكل الاقتصادية اللي ملايين كانوا بيمروا بيها.

الفن مش هدفها الأول

جمال ياسمين ناس كتير اتفقت عليه، والدليل إنه تم اختيارها 4 مرات ضمن أجمل 100 وجه في العالم، لكن موهبتها واختيار أدوارها فيه اختلاف شوية، ومن وجهة نظرالنقاد محتاجه تاخد دروس تمثيل وتغير نوع الأدوار اللي بتقدمها علشان تتميز أكتر كفنانة.

بتقلد عارضة الأزياء جورجينا

في طريقة اللبس وتسريحة الشعر والمكياج، كان في تشابه كبير بينهم، وبدأت الناس تربط بين الشخصيتين وتقول إن ياسمين بتحاول تقلد عارضة الأزياء جورجينا رودريجز حبيبة اللاعب كريستيانو رونالدو، وبدأوا يجمعوا صورهم وينشروها على السوشيال ميديا والموضوع اتحول لكوميكس.

ماشية بدماغها ومش مهتمة برأي والدها

بين كل فترة والتانية، والد ياسمين صبري كان بيطلع بتصريحات جريئة جدًا عن حياتهم الشخصية، وأي تصريح منها ماكنش بيعجبه كان بيرد على طول ووصل الأمر لإنه كان بيدعي عليها في العلن كده، الأمر ده وصل للبعض فكرة إنها مش مهتمة بأهلها لا في قرارتها ولا في حياتها أصلًا.

وأخيرًا.. إحنا بنعتبر ياسمين صبري إنسانة قبل ما تكون فنانة وشخصية عامة، ومن حقها تعبر عن نفسها وتخوض تجارب وتتعلم، وبنتمنى لها الاستقرار والنجاح، إحنا فقط بنحاول نحلل أسباب كونها دائمًا تريند.