مرة جديدة اتجدد الخلاف والاتهامات المتبادلة بين الفنانة شيرين عبد الوهاب وطليقها حسام حبيب، بعد مداخلتها مع الإعلامية لميس الحديدي في برنامجها "كلمة أخيرة"، كشفت خلالها كواليس حياتها معاه. تعالوا نعرف أبرز كلام شيرين:
1- كنت متجوزة واحد مابيروحش يشوف أهله ولا أصحابه، فضلت جنبه لإني ماحبش اتهزم، وبصراحة أنا خدامة الراجل اللي أعيش معاه.
2- إشاعات الإدمان اللي طلعت عليا، المقصود بيها إدمان الأدوية مش حاجة تانية، أنا لو تعبت وتخنت ده من حياتي وعشرتي لحسام حبيب، كنت زي البدر بقيت شبه حسن أبو السعود.
3- أنا مش فاضياله خد أكتر من حقه، دلوقتي بحضر أحلى أغاني وأحلى فيلم فيه دنيا مستنياني.
4- استغل فرصة إني في الساحل وسرق عربية مرسيدس بتاعتي كانت مكتوبة باسمه، وهددني إنه هيعملي محضر، فوق يابني واعرف أنت بتتكلم مع مين.
5- أنا ماخدتش من الجوازة دي غير الهم والحسرة والندم، بحاول أحافظ على نفسي أنا زي الفل، بس لازم أروح أتعالج منه ومن أثاره عليا.
6- أنا ست بخلف، لكن ربنا أراد إني أعيش معاه 4 سنين وماخلفش منه، عشان ربنا حاميني.
7- تامر حبيب شافني أعد يعيط عليا نص ساعة، أنا بقيت صعبانة على الناس كلها.
8- هثبت بالأوراق إني كنت متكفلة بالكامل بمصاريف بيته التاني، علشان والدته ووالده بيقولوا ضيعتي عمر الولد، هو اللي طول عمره مابيشتغلش، وعاطل بالوارثة.
9- أهله باصين لي في كل حاجة، لما كنت بعمل أغنية وتنجح أكيد أمه كانت بتقول اشمعني ابني، عشان أعوض السم ده، كنت بدفع 10% من كل الشغل اللي كان بيساعدني فيه. 10- بعد ما اتطلقنا حسيت إني لسه محتجاله ومش قادرة استغنى عنه، وقولت أديله فرصة تانية.
11- كنت بحبه بجد ومفكراه ابني مش بس جوزي، اهتميت بيه لدرجة إني عملت استديو في بيتي علشان شغلنا يتعمل فيه، واشتريت ليه كل الأغاني اللي عجبته بشيكات باسمي.
12- قالي إنتي تخنت وبقيتي شبه أمي، وأنا عايز واحدة رفيعة أتباهى بيها قدام الناس، غير الخناقات اللي كان فيها ضرب وسحل على الأرض، وشتمية مفيش إنسانة تقبلها على نفسها.
13- حسام كان بيتردد على البيت كتير، علشان كنا بنخلص شغلنا، وكنت بحاول أعمل تأهيل لبناتي إنه لسة في حياتنا وممشيش، بس رجعت تاني المشاكل وقلة الأدب.
14- دكتوري النفسي قاله لما اتعصب، يسبني ربع ساعة لوحدي، بس للأسف كان بيفضل قدامي يحرق أعصابي.
15- قصيت شعري في "الفور سيزون"، كنت أعده هناك علشان تعبت منه، جالي وطلب مني أنزل معاه للمأذون علشان يطلقني، فجبت المكنة وقصيت شعري من الضغط عليا.
16- أنا أسفة على اللي عملته في نفسي وبناتي وجمهوري، أنا غنيت وأنا "قرعة" علشان بناتي ميتعقدوش باقي حياتهم، وتعبت لما الجمهور شافني كده.
17- مش عيب الست المشهورة تحاول تحافظ على بيتها، بس ده ماكنش بيت، دي كانت مصيدة فيران، أنا اتجوز قرد ومارجعش ليه تاني، ومش عايزة أعرف حد اسمه حسام تاني.
