هو مش مجرد حمام لا ده حياة، حمام البنات مختلف زي اختلاف أمزجتهم كده. وزي ما بيسموه "بيت الراحة"، فهو بيت راحة كتير من البنات في أي وقت وفي كل مكان. يعني البنت تدخل الحمام شخص، تخرج منه شخص تاني مقبل على الحياة أكتر. تعالوا نعرف السر في الموضوع ده، وإيه اللي بيحصل بالظبط في حمام البنات:
- قرارات مصيرية وفركشة
بنات كتير خدت قرارت مصيرية في الحمام، وتحديًدا قدام المراية. منها قرار الفركشة. يعني البنت ممكن تكون بتفكر تسيب حبيبها، بس مش عارفة تقوله إزاي. ربع ساعة من التفكير العميق في الحمام بعيد عن الدوشة والضغوط، بتلاقي الإلهام نزل عليها من حيث لا تدري. أو قرار الاستقالة من الشغل مثلًا. أي قرار مهم بيتاخد في الحمام حضرتك.
- سيلفي غير
في سر غريب إن سيلفي الحمام بيكون أحلى من أي سيلفي، ممكن تاخديه في مكان شيك أو سفرية على البحر حتى. جايز علشان البنت بتكون لوحدها فبتعمل اللي هي عايزاه. في الحقيقة العلماء محتارين في الموضوع ده، لكن هيوصلوا لحل.
- كابينة تليفونات
متستغربش لما تكون خارج مع بنت في كافية، وتقوم تدخل الحمام وتتأخر عليك. متقلقش هي أكيد مش بتاخد شاور، بس غالبًا بتكلم صاحبتها الأنتيم بتحكيلها تفاصيل الخروجة يامعلم. وبناء عليه هيتم التعامل معاك بعد كده. كمان أي مكالمة مهمة سواء لتحديد معاد إنترفيو، التعرف على صديق جديد، بتكون اتعملت في الحمام.
- بيستوعب العياط
في سر غريب بيجذب البنات أنهم يعيطوا في الحمام، رغم التحذيرات الكتير إنها حاجه مش لطيفة. لكن مراية الحمام شاهدة على عياط وانهيار بنات كتير. وده لإن في بنات بتحب تشوف شكلها وهي بتعيط. ده الموضوع ممكن يكبر كمان وتاخد سيلفي وهي بتعيط، وتبعتها لصاحبتها أو صاحبها.
- التدخين بكل أريحية
في الأماكن العامة بتتعرض بعض البنات المدخنة لنظرة مش لطيفة أحيانًا، وده لأننا في مجتمع شرقي له تقاليد معينة. وبيفرض سلوك معين لازم كل البنات تعمله، وبالتالي الحمام هو أنسب مكان لشرب السجاير.
- النميمة
معروف عن البنات حكاياتها وتفاصيلها الكتير، ودي مبتحلاش غير في الحمام. فيه بيعرفوا أخبار بعض، وأخبار الناس. مين صاحبت مين فركشت، فستان البنت اللي كانت في الفرح جابته منين، الجاكيت الغريب اللي لابسه المدير النهارده.. إلخ
