عاشت مصر وعيشت معاها العالم كله ليلة ماتتنسيش، وقدرت من خلال حفل موكب المومياوات الملكية اللي سبقه افتتاح المتحف القومي للحضارة، تبعت رسالة لكل شعوب الأرض بإنها "أم الدنيا". وسط اهتمام إعلامي عالمي وحضور مميز لرئيس الجمهورية عبد الفتاح السيسي. مين فينا ماحسش بالفخر والعزة إنه مصري والأجمل إن الشعور ده اتنقل لجنسيات تانية كتير جوه مصر وبراها، وعبروا عن انبهارهم بروعة حضارتها القديمة والحديثة، وكمان اتمنوا زيارتها في يوم من الأيام. وبعد الليلة العظيمة دي جمعنالكم أهم 5 مشاهد مش هننساهم من الحفل:

1 - عازفة التيمباني

فنانة مصرية عظيمة، اسمها "رضوى البحيري" شاركت في فريق العزف بقياد الموسيقار الكبير نادر العباسي على، وظهروها على الشاشة ماكنش عادي، وخلى كل المصريات يحسوا بقوتهم وقيمتهم بجد.

2 - خالد النبوي

نجم الحدث، ووجوده كان إضافة كبيرة للحفل، شارك في فيلم تسجيلي قصير بعنوان "مصر الحضارة"، اتعرض خلال الحفل، وزار خلاله 22 مكان آثري في مصر بعد ترميمهم وتطويرهم، واللطيف إنه خلال زيارته للمعبد اليهودي كان لابس الشال الفلسطيني وده كان له تأثير مبهج على المشاهدين.

3 - إكسسوارت الفنانين المصرية القديمة

شوفنا نجوم مصر الشباب وهما بيحكوا لنا عن عظمة تاريخنا وعبقرية أجدادنا، مرة من قدام الأهرامات ومرة من جوا المعابد، وهم: "أحمد عز- أحمد حلمي- كريم عبد العزيز". الكل لاحظ تزيين بدلهم بالرموز الهيروغليفية، مافيش أجمل من كده شياكة وفخامة.

4 - عمال عربات نقل المومياوات

عظمة الموكب وظهوره بالشكل المشرف ده، وراه تعب عمال إيديهم تتلف في حرير، فنانين من الطراز الأول، وهم كلمة السر في رجوعنا لـ 7000 آلاف سنة عشان نحس وكأننا في تشريفة ملكية.

5 - فرحة المصريين بأجدادهم

سواء على السوشيال ميديا أو في الشوارع، كلنا حسينا بجمال بلدنا وحضارتنا، وده ظهر في صور كتير ملت مواقع التواصل، هتفضل من أجمل ذكريات تاريخنا الحديث.

فريق كلام القاهرة بيبعت رسالة حب وتحية لكل المشاركين في الحدث.. شرفتونا.