أكيد وأنت بتقلب على الفيسبوك أو تويتر أو وسائل السوشيال ميديا عمومًا، لاحظت تكرار اسم "شيماء" في بوستات ناس كتير أو حتى شاء القدر ووقع تحت إيدك الكليب إياه، لكن لو أنت من الكام مواطن اللي مش فاهم مين شيماء وإيه حكايتها، إحنا هنقولك.

نشر واحد من مؤدين المهرجانات المغمورين اسمه يوسف أحمد الشهير بـ "سوستة"، فيديو كليب اسمه "شيماء- ارجعي متخافيش"، أكيد جه في بالك إن شيماء دي حبيبته الي سابته وبيغني لها مثلًا، لكن الحقيقة غير كده خالص عزيزي المواطن.

"شيماء" اللي قلبت مصر كلها في يومين، وبسببها الفيديو كليب عدى الـ 2 مليون مشاهدة، هي "بطة"، اتلخبطت تاني وافتكرتها اسم الدلع للبنت اللي بيحبها؟ مضطرين مانخبيش عليك أكتر من كده، هي "بطة" بحق وحقيقي من اللي بتتاكل أول يوم في فطار رمضان دي، والله زي مابنقول لك كده.

"سوستة" قرر يلبس تيشيرت بسيط وبنطلون وشبشب وياخد معاه البطة بتاعته "شيماء" ويعملوا فيديو كليب، وفضل يغني وكأنه واحد لسه مفركش مع حبيته .

يوسف أحمد فوزي، عرف نفسه في لقاءات تليفزيونية، قال إنه خريج كلية سياحة وفنادق، وعنده 23 سنة، ووضح كمان إن الهدف من الكليب هو إضحاك الناس مش أكتر، وإنه كان هيصور معزة بدل بطة لكن رجع في كلامه علشان أي بنت اسمها شيماء ممكن تزعل.

بعد السخرية من الأغنية والجدل الكبير حواليها، "سوستة" قال إنه مش زعلان خالص، وطالما الناس ضحكت واتبسطت يبقى هو كمان مبسوط، ووضح برضه إنه مش خايف يتمنع من الغناء زي مطربين المهرجانات في الفترة الأخيرة، وإنه بيستعد دلوقتي علشان ينضم لنقابة الموسيقيين بشكل رسمي.