بطريقة كوميدية، نشرت حسابات على فيسبوك ويوتيوب، نسخ ساخرة من إعلانات الأحياء الراقية اللي بتعرض في شهر رمضان، وأشهرها إعلان Zed اللي شارك فيه مجموعة كبيرة من نجوم مصر منهم يسرا ونيللي كريم وكريم عبد العزيز وغيرهم.
ونشر أحد الحسابات على فيسبوك مقطع فيديو بيوضح فيه الفرق بين المناطق الشعبية وأجواءها وبين الأحياء الراقية، وظهر في الفيديو أهل مصر البسطاء وهما بيمارسوا عملهم بكل رضا، من "القهوجي – لبياع الترمس" وغيرهم، شوفنا كمان شوارع زحمة في مناطق زي "شبرا- المرج" كلها دفا وأمان وونس، ورغم قلة الإمكانيات لكن أهلها حاسيين بالرفاهية، وبيعرفوا يبسطوا نفسهم بأقل حاجه.
إعلان تاني على يوتيوب نشره سكان بولاق الدكرور، معمول على نفس لحن أغنية إعلان Zed، وبيظهر فيه سكان مناطق مختلفة في بولاق زي شارع ناهيا وشارع همفرس والطابق وهم بيغنوا نفس الأغنية.
وسواء بقا كنت عايش في حي شعبي أو كومبوند فخم المهم إنك تكون في مصر.
