هتفضل خطوة الجواز، محيرة ناس كتير، حب حقيقي ولا جواز صالونات؟ اختبره قبل الجواز ولا أنا وحظي؟ كل تفصيلة من دول وأكتر، بيناقشها فيلم "عروستي" للنجمين أحمد حاتم وجميلة عوض، لكن الجديد إن الفيلم معمول بخفة ولذاذة مش طبيبعة.

وإحنا في "كلام القاهرة" روحنا واتفرجنا على الفيلم مع أبطاله في العرض الخاص، وهنقول لكم على حاجات عجبتنا من غير ما نحرق لكم الأحداث:

1 - الفيلم متصور في "زيد بارك" الشيخ زايد، يعني ألوان وبهجة للصبح، هتحس في لحظة إنك سافرت "ديزني لاند"، ويمكن كمان تغير رأيك وتبطل تخرج لكافيهات ومطاعم بس.

2 - البدايات وحلاوتها، أحمد حاتم وجميلة عوض لايقين على بعض كده، واللحظات الرومانسية اللي ما بينهم، هتفتح نفسك على الحب لو سينجل، وتحسسك إنك لازم تحب شريكك أوي لو مرتبط.

3 - مروان يونس، لابس كام "لوك" ونضارة هايلين، يظهر بيهم على "ريد كاربت" أوسكار 2021 مرتاح.

4 - طول عمرنا بنربي قطط وكلاب عادي، بس من الواضح كده بعد الفيلم ده، هنربي معيز صغيرة كمان عادي. (هتفهموا أكتر لما تشوفوا الفيلم).

بالصور: النجوم والمشاهير في العرض الخاص لفيلم "عروستي"

5 - كلنا بنغلط وكلنا لازم نسامح، أجمل رسالة قالها الفيلم، أما فكرة اختبار الشخص قبل ما نرتبط بيه، فنهاية الفيلم جاوبت عليها.

6 - اليوجا مهمة يا جماعة، وخصوصًا للبنات لأنها بتخلي ترابيسها حلوة، وده مش كلامنا ده كلام "شريف" لـ "دليلة"، هتفهموا لما تتفرجوا على الفيلم.

7 - لسة شهقة الملوخية، من أهم الحاجات اللي لازم تتعلمها البنات عشان تكون ست بيت شاطرة.

8 - على قد ما السوشيال ميديا ساعات بتنكد علينا، بالذات بعد مرحلة الانفصال، بس الفيلم هيخلينا نشوفها بطريقة مختلفة.

9 – "عروستي" لعبة لذيذة، لعبناها كتير وإحنا صغيرين، ولسه بنلعبها في حياتنا كمان، بس يا ترى هتنفع في الحب والجواز؟