طرح النجم محمد حماقي، مؤخرًا، أغنيته الجديدة "لو هتسيب"، واللي فكرتها لمست قلوب ناس كتير، أو بمعنى أصح "جت على الجرح"، حماقي بيقول في الأغنية لحبيبه اللي قرر يخرج من حياته "لو هتسيب موافقك عادي بس تسبيني بشروطي"، وطبعًا هنا مش بيتشرط عليه ولا حاجه، بالعكس ده بيستعطفه يكون حنين عليه في لحظة وداع مالوش قرار فيها، علشان كده قولنا ندردش معاكم في كام حاجه مهمة في مرحلة الفركشة مهما كانت أسبابها، لعل وعسى تطبطب على قلوب اللي كانوا حبايبنا في يوم من الأيام.

1- بلاش تنسى لحظات الحب اللي كانت بينكم، يعني ماتحسسش الطرف التاني إن مشاعرك اتغيرت فجأة وبدون مقدمات ناحيته، لإنه مش هيستوعب ده، أكيد عيشتوا حكايات وذكريات سوا. واحدة واحدة عليه وحاول ماتهدش كل اللي كان، علشان عمرك ما هتعرف تمحيه من ذاكرتك أو ذاكرته.

2- بلاش تقوله كلام مش مقنع، زي: "هتكون أحسن من غيري – تستاهل حد أحسن مني- بتمنالك تلاقي السعادة مع غيري" وغيرها، الكليشيهات دي عمرها ما هيقتنع بيها حد أنت كنت في يوم كل حياته.

3- مهم كمان تنقي كلامك، يعني مش لطيف خالص تقوله عيوبه اللي كنت حاببها زمان، لإنه هيكون حساس جدًا في الموقف ده، غير إنك ممكن تكون سبب في هز ثقته بنفسه بعدين، وخليك فاكر: ماحدش فينا ما فيهوش عيوب.

4- بلاش تلقيح على السوشيال ميديا، ما هو مش هتكون أنت اللي بايع، وكمان تشير بوستات تضايقه بيها، ده غير إن دي طريقه مش متحضرة خالص ومش هتفيدك بالعكس.

5- بلاش حركات التهديد والابتزاز والانتقام. ابعد خالص عن الجو ده، حقيقي مافيش أحسن من إنك تكون شخص مش مؤذي ونضيف من جواك.

6- من حق شريك عليك إنك تتتكلم معاه قبل ما تاخد قرار إنهاء العلاقة، والأهم يكون الكلام وجهًا لوجه، لأن فكرة إنك تبلغه قرارك في شات أبشع حاجة ممكن تعملها، خصوصًا لو بينكم عشرة كبيرة.

7- على قد ما تقدر حسسه إنك حبيته من قلبك، وإنه صحيح مابقاش ينفع تكملوا، لكنك هتفضل شايفه حد كان جميل في حياتك. ده أهون عليه من إنك تقول له إنك مابقتش بتحبه خالص.

8 - فكرة إنك تتكلم وحش على حد كان حبيبك وسندك من كام يوم بس، مش هتبينك قدام الناس غير إنك شخص مش سوي ومالوش أمان، فنهدا كده ونعقل الكلام.

9- "بلوك بلوك بلوك" مش دايمًا بيكون حل كويس في معظم العلاقات، مافيش مشكلة تطمن عليه من وقت للتاني لو العلاقة تسمح، بلاش نتحول لأعداء يا جماعة.

وأخيرًا.. بلاش ننسى إن القدر أوقات بيجمعنا بأشخاص مش هنقابل زيهم كتير في حياتنا ويستحقوا نفضل فاكرينهم بكل خير.. وحب.