بتعدي علينا أيام مميزة كتير، لكن كمان السنة فيها شهور مش عادية، منها شهر سبتمبر، اللي بنفتكر فيه نجوم بنحبهم، بعضهم رحل في الشهر ده، وبعضهم اتولد فيه.. نجوم حبيناهم وجزء من ذكريتنا وحكايتنا معاهم، حاجه كدة زي ما قال الشاعر الكبير فؤاد حجاج "لحظة ميلاد الفرح .. كان فيه حبيب رايح"، علشان كدة قولنا فرصة نهني العايشين بسنة جديدة، ونفتكر اللي غابوا بكل خير.

خالد النبوي

هيحتفل الفنان خالد النبوي بعيد ميلاده الـ 55، يوم 12 سبتمبر، وطبعًا لإنه رياضي طول الوقت شكله شباب وشيك، وده خلى جاذبيته مضروبة في اتنين، وليلة كبيرة سعادتك.

عبلة كامل

يوم 17 سبتمبر سنة 1960، اتولدت نجمة مهما غابت ضيها مايغبش عننا، فنانة في حتة تانية خالص بجد، حقيقية وقريبة لدرجة تخليك شايفها في شخصيات كتير حواليك، ودي أكتر حاجه بتميزها.

محمد عادل إمام

من مواليد 16 سبتمبر، قدر يحقق شعبية كبيرة وياخد لقب "نجم شباك" بأدائه الرايق، مش بس كده لسه عنده كتير يقدمه، وده بيبان مع كل شخصية مختلفة بنشوفه فيها.

كم أنت عظيم يا سبتمبر..

فؤاد المهندس

صحيح ودعنا يوم 16 سبتمبر 2006، لكن لسه فنه قادر يضحكنا ويبسطنا، وهو فيه حد مننا ما وقعش من الضحك لما سمعه بيقول: "كنتي سيبيه يمسكها يا فوزية .. يمكن كانت تطرى في إيده".

خالد صالح

25 سبتمبر 2014، اليوم اللي خسرنا فيه "العبقري"، فنان من النوع اللي مابيجيش زي غير كل كام سنة كده، ولحد دلوقتي ما حدش قال: "أنا بابا يالا" زيه.

تحية كاريوكا

في 20 سبتمبر من 22 سنة فاتوا، رحلت أول راقصة حببت الناس في الرقص الشرقي، اسمها الحقيقي بدوية محمد كريم، وبعد تقديمها رقصة "الكاريوكا" في عرض مع فرقة بديعة مصابني، ارتبط اسمها بـ اسم الرقصة واتشتهرت بيه.

ماغبتوش ولسه بنحبكم ..