في الساعات الأخيرة، حقق "فوتوسيشن" حديث للفنانة نادية الجندي خلال استمتاعها بإجازة الصيف على البحر، جدل واسع على مواقع التواصل الاجتماعي، والحقيقة إن ظهورها ماكنش عادي خالص، خاصة إنها ظهرت بشكل شبابي أثار تعجب ناس كتير، والبعض استغرب احتفاظها بجمالها وشبابها وشياكتها لحد النهارده، ده غير الناس اللي تنمرت عليها بتعليقات غير مقبولة. والأزمة هنا هي إن فيه ناس كتير بيعتبروا التقدم في السن حرمان من الحياة، وكمان بيحكموا على اللي عايز يعيشها صح بأحكام مش منطقية وبيتهموه اتهامات غريبة وكإنه عمل جريمة!
علشان كده في "كلام القاهرة" حبينا ندردش معاكم عن كام حاجة حلوة لفتت نظرنا في الـ "الفوتوسيشن" دي، اللي بتعلمنا إننا لازم نستمتع بحياتنا مهما كان سننا.. وإنه مش عيب أبدًا نهتم بشكلنا ولياقتنا وصحتنا مهما كان عمرنا.. تعالوا نعرف أهم الحاجات اللي ممكن نتعملها من "نادية".
الروح الحلوة
بتقول "نجمة الجماهير" في معظم لقاءاتها، إن سر جمالها الخارجي هو روحها، وبتشوف إن الشخص المتصالح مع نفسه من جوه، بيبان على وجهه وطريقته في التعامل مع الناس، وكل ده بيخليه حابب نفسه بكل ما فيها.
السلام الداخلي
قالت كمان إن الإيمان بيفرق جدًا مع أي شخص، لإنه بيكون حاسس بـ طاقة أمان وسلام داخلي من نوع خاص، مش هيلاقيها غير بس مع الجانب الروحي والعبادات.
الرياضة
مش بس علشان صحتنا تكون أفضل، كمان شكلنا هيبان أصغر وجسمنا هيكون مشدود لوقت طويل من عمرنا، الرياضة كمان مش للشباب بس، بالعكس من حق أي حد يمارسها، فلو قابلت في حياتك حد سنه مش صغير وبيمارس رياضة، شجعه على ده، وشجع كمان أي حد كبير في عيلتك على ممارستها، حتى لو كانت مجرد المشي نص ساعة كل يوم.
ماتستهلكش نفسك
في مشوار حياتنا، بنتعرض لمواقف كتير منها الحلو والوحش، استمتع بالجميل منها وعيشه بقلبك، والأهم كمان إنك متدخلش في مشاكل وصراعات مش مهمة، لإن مش كل مشكلة ها نسمحلها تهدنا وتسرق من وقتنا اللي هو عمرنا.
نام بدري وكل صحي
الأجيال اللي سبقونا، ما كنش عندهم رفاهية دلوقتي، لا موبايل ولا إنترنت يسهروا عليه للصبح، ويمكن ده سر من أسرار الشباب وتأخير علامات الشيخوخة عليهم، لإن زي ما كلنا عارفين إن ستايل حياتنا اليومي له تأثير كبير على شكلنا وصحتنا، مهما حاولنا نهرب من ده. كفاية بقى فاست فوود وأوفر ثينكينج لبعد 12:00 الصبح!
السن مش عيب
واحدة من الجمل اللي ضروري تكون شايفها قدام عينك طول الوقت، وزود عليها كمان "السن مجرد رقم"، مهما سمعت حواليك من أفكار بتحتكر الحياة على سن معين، ما توقفش عندها وكمل عادي، مش بس كده ساعد والدك أو والدتك إنهم يعملوا حاجه بيترددوا يعملوها علشان سنهم.
كفاية خوف من المجتمع .. وعيشها بفرحة لآخر لحظة في عمرك
