إحساس جميل إنك تصحى الصبح من النوم على زقزقة العصافير وهي بتصبح عليك. علشان كده إحنا في كلام القاهرة هنعرفك 5 أنواع من العصافير ينفع تربيهم في البيت:

1- البادجي الاسترالي

ده أسهل نوع تربيه، وأي حد بيربي لأول مرة يعرف يربيهم بسهولة. سعره رخيص يبدأ سعر الجوز بـ 20 جنيه ويصل لـ 200 جنيه.

2- الحب "الفيشر"

واتسمى كده علشان دايمًا فيه حب متبادل بين الذكر والأنثى. بيعيش من 10 لـ 15 سنة، وهو من الأنواع المحببة في مصر. سعر الجوز يبدأ من 90 جنيه، وبيوصل لـ 1200 جنيه.

3- الزيبرا

رغم حجمه القليل، إلا أنه نشيط جدًا ورشيق وبيتحرك كتير. بس لازم يعيش في مجموعات. سعره بيبدأ من 40 جنيه للجوز، وبيوصل لـ 300 جنيه.

4- الكوكتيل

محبوب لكل المربيين علشان دمه خفيف وألوانه جميلة. وهو من الأنواع كبيرة الحجم. سعره بيبدأ من 90 جنيه وبيوصل لـ 350 جنيه.

5- الكناري

حجمه كبير ومختلف، وكمان ملحن. يعني هتسمع أصوات عذبة دايمًا. ورغم إن عمره مش طويل لكن سعره غالي، بيبدأ من 400 جنيه وبيوصل لـ 2500 جنيه.