من فينا مايحبش يشوف قصة حياة الفرعون المصري محمد صلاح اللي جنن العالم بموهبته وأخلاقه في مجال كرة القدم على شاشة السينما أو التليفزيون؟ تفاصيل حياته، هواياته، علاقته ببناته ومراته وأهله، إزاي بيواجه الفشل وإزاي بيحتفل بإنجازاته اللي بتكبر يوم بعد يوم.. حكايات كتير بين السطور لازم تتبروز بحب في لوحة درامية جميلة لكن مش أي فنان هيقدر يرسمها.
وإحنا فكرنا في نجوم متألقين على الساحة الفنية، شوفنا فيهم محمد صلاح على الشاشة، يالا نعرفهم:
خالد النبوي
غول تمثيل، بيعرف يجسد أي شخصية بيعملها وتصدقه من أول مشهد، يعني هنشوف مو صلاح في الملعب بكل ريأكشناته سواء كان مبسوط أو حزين وكأننا شايفنه قدامنا من غير أفورة.
أحمد حلمي
كاريزماتك وميختلفش على حبه إثنين، زي أبو مكة بالظبط، يعني متعة المشاهدة هتكون مضروبة في اتنين، ده غير إنه بدأ نجوميته من الصفر فهيجسد رحلة صعود ونجومية صلاح بصدق وإحساس حقيقي.
آسر ياسين
نجم حركته خفيفه على الشاشة، وظهر ده في آخر إعلان له لما فاجأنا بتقليد رقصات المطرب العالمي مايكل جاكسون بكل احترافية، وده معناه إن عنده ليونة ولياقة بدنية عالية، وبالتالي هيقدر يجري في الملعب، وكمان هيقوم بتمارين اليوجا اللي بيعملها "صلاح" بعد كل جول بيحققه في الماتشات ببراعة.
أحمد مالك
مش تقليدي وجرئ خاصة في لبسه، وشوفنا ده في أكتر من فوتوسيشن ومهرجان له، والحتة دي عند "صلاح" برضه، اللي ماعندوش مانع يلبس ستايلات عجيبة، كل ده بجانب إنه من أحسن الفنانين الشباب في الفترة دي، وجمهوره من أعمار مختلفة جوه مصر وبراها، يعني العمل الفني هيتشاف هيتشاف.
أحمد فهمي
رغم إنه أهلاوي متعصب، لكنه بيفهم في الكورة كويس وعارف أسرارها، وهيساعده في الدور ده جسمه اللي قريب شوية من جسم الفرعون العالمي، واللطيف هنا إنه أصدقائه كتير من الوسط الرياضي، يعني مش بعيد نشوف لاعيبة كورة كضيوف شرف في العمل، كعادته في معظم أعماله.
وأنتم كمان قولوا لنا مين النجم اللي نفسكم تشوفوه بيجسد شخصية محمد صلاح على الشاشة؟
