تغيب تغيب، ولما تظهر تقلب الدنيا كلها. روبي من الفنانات اللي ظهرورها رغم إنه محسوب وقليل، لكن له تأثير مختلف وبيعلق مع الجمهور. إمبارح ولعت السوشيال ميديا بفيديوهات غناها ورقصها في الـ after party بتاع حفل ختام مهرجان القاهرة. اللي انتشرت بشكل رهيب. وده يخلينا نرجع كل مرة، نتكلم عن مدى حبنا وإعجابنها بيها.

وفي السطور الجاية قولنا نجمع لكم 10 أسباب بتخلينا نحب روبي حب مالوش نهاية:

1- جمال وسمار مصري يخطف العين

ملامحها الجذابة وسمارها الهادي، جمال مصري أصيل نادر الوجود. مجرد رؤيتها بتسبب راحة نفسية مفاجأة.

2- تلقائية

بسيطة ومش مصطنعة. طريقة كلامها هادية وبسيطة، بتخليها تدخل قلبك من غير استئذان.

3- متعددة المواهب

بترقص حلو، تغني حلو، وبتمثل كمان حلو. أغانيها بتكسر الدنيا ومبتتنسيش، رغم إنها قالت إنها مش مطربة من الدرجة الأولى.

4- دلوعة

روبي دلوعة دلع خفيف، الدلع اللي تحبه ويدخل قلبك. الدلع اللي يخليك انت عايز تقرب لها، من غير ما هي تبذل أي مجهود. من غير اسهوكة واستظراف أو أفورة.

5- كاريزماتك

من أهم أسباب حب الناس لروبي، كاريزمتها. لها طلة كده بتخطف القلوب. تحب تتفرج عليها مهما كانت بتعمل، حتى لو هتقول كلمتين وتمشي. وبلغه السينما "بتسرق الكاميرا".

6- شجعت الناس على الرياضة

الناس هاجمت كليب "ليه بيداري كده" أول ما ظهر، رغم إنه كان كله فوايد صحية. الكليب كله كانت روبي في الجيم وبتلعب رياضة، في وقت سيطرت علينا فيه الوجبات السريعة، وزادت معدلات السمنة. روبي علمتنا إن العقل السليم في الجسم السليم.

7- دورها في "سجن النسا"

روبي غنت عجبتنا، عملت استعراضات وبرضو عجبتنا، ولما قولنا خلاص كده جابت آخرها، فاجأتنا بشخصية "رضا" في مسلسل (سجن النسا) مع نيللي كريم. روبي عملت دور عبقري، خلت كل الناس ماتتكلمش عن المسلسل، إلا لما يعلقوا على دورها المميز.

8- أغانيها كانت ومازالت مميزة

في أوائل الألفينات أغاني روبي كانت طفرة، كانت حاجة مش متعودين عليها. وقولنا يومين وهتتنسي. لكن الغريب إن أغانيها فضلت معلمة في الذاكرة، ولحد دلوقتي حافظينها وبنغنيها بنفس حماس أول مرة. وعن رقصها واستعراضاتها في الكليبات، الكلام يطول.

9- أيقونة إغراء

نقصد الإغراء الجذاب الملفت، مش المبتذل. أجيال كتير دابت في جمال روبي وأنوثتها، وحلاوتها بيتفق عليها الولاد والبنات. واللي مزود جاذبيتها يمكن بساطتها وتلقائيتها، اللي قولنا عليهم. المهم في النهاية إنها ملفتة بشكل جميل.

10- لسه ماعرفناش ليه بيداري كده؟

فاتت سنين، ولسه روبي بتتسأل ليه بيداري كده ولا هو داري كده؟ وبصراحة إحنا مهتمين نعرف هو ليه بيداري كده. علشان كده في كل مرة بتغنيها، بيكون عندنا أمل نعرف الإجابة. وغالبًا الأمل ده مستمر مع كل مرة بتغني.