من ساعات قليلة، طرح الفنان الشعبي عمر كمال فيديو كليب أغنيته الجديدة "أوعدك- ملبن مصر"، وشاركته الغناء الفنانة سمية الخشاب، والحقيقة إن الكليب غريب حبتين سواء في التصوير أو الكلمات، والحقيقة عندنا 5 ملاحظات على العمل ده.
1- إيه التصوير الغريب ده؟ هو الكليب ده اتكلف كام بالظبط؟ لوكيشن واحد وزاوية واحدة؟ مافيش أي مجهود أو إبداع، ده حتى ريتم الأغنية وكلماتها متاخدين من أغنية "أشكرك"، لمطرب المواويل محمد العجوز، واللي اتعملت بعد كدة مهرجان اسمه "أشكرك - أوعدك" وغناه حسن شاكوش ومحمد بكر سنة 2013.
2- ناس كتير ماحستش إنه فيه توافق بين عمر وسمية، خاصة إن فيه فرق سن ما بينهم، ومافيش أي هارموني فني بين الاثنين، وكان واضح إنه مش لايق خالص إنه يعاكسها أو يكونوا في قصة حب سوا. هو الحب بالعافية يا سمية؟
3- ناس تانية شافت إن ظهور سمية الخشاب ماكنش أفضل حاجة، وإنها بتستعرض عربيتها "اللامورجيني" من غير أي هدف فني. هو مافيش استايلست بربع جنيه يا جماعه؟
4- لو اتفرجت على مسلسل "موسى" في رمضان اللي فات، هتفهم ليه اتقال واتكرر وصف "ملبن مصر" في الأغنية، وكأن سمية بتحاول تطلق اللقب ده على نفسها. مش بالعافية يا سمية والله.
5- الأغنية مش على مستوى الدعاية الكبيرة اللي اتعملت لها على السوشيال ميديا قبل نزولها، والكل كان متوقع تكون قوية أكتر من كده، وكمان جمهور عمر كمال شاف إنه قدم أغاني أحلى من كده كتير. يلا هارد لك!
وأخيرًا..
بنحترم الفن، وبنحترم حرية كل مبدع في إنه يقدم كل اللي يحبه بكل حرية.. لكن السؤال: هو ده فن؟
