أيام وهيخلص الشهر اللي هون علينا غلاسة أغسطس، حر وفرهدة إلى مالانهاية، أما سبتمبر وحسب كلام العلماء. فا ده شهر طيب كده وهادي، لا حر أوي ولا برد أوي. وعلشان سبتمبر كان شهر رايق، دي 5 حاجات حصلت في أيامه هتخليه يوحشنا:
- الجو لطيف
سبتمبر بيجي ومعاه نسمات هواء منعشة بنحس بها بالليل. والجو بيبدأ يبرد شوية يعني المود بيتغير للأروق. الحر بيقل وده بيبسط الناس اللي بتركب مواصلات كل يوم.
- أحلى وقت للمصيف
طول الصيف بتكون المصايف زحمة والأسعار غالية. لكن في سبتمبر ومع قرب الدراسة، بتبدأ الزحمة في المصايف تقل. وأسعار الإيجار كمان بتقل، وتزيد عروض التخفيض. ساعتها تعرف تظبط أحلى سفرية مصيف مع أصحابك، من غير دوشة وزحمة.
- المدارس قربت
صحيح السنة دي الدراسة هتبدأ في شهر أكتوبر، بس ده مايمنعش إن الأمهات من دلوقتي بتعد فاضل كام يوم، علشان تلحق تستمتع كام ساعة الصبح من غير زن الولاد. ورغم إن أيام المدارس مليانة مسؤليات، لكن أمهات كتير بتستناها وكل واحدة وليها أسبابها.
- الشتاء والحب والحبّيبة
بما إن سبتمبر بيمهد لبداية الشتاء، يعني إحنا داخلين على موسم الرومانسية والعشق. كمان في نظرية علمية بتقول إن مشاعر الحب بتلتهب في الشتاء، وده له علاقة إن الليل بيكون طويل. يعني العشاق عندهم وقت كبير يحبوا في بعض براحتهم.
- - شهر فني بإمتياز
من بداية سبتمبر، والنجوم بيحتفلوا مع جمهورهم في أماكن كتير، أنغام وعمار الشريعي وبهاء سلطان ونجوم أكتر، ده غير مهرجان القاهرة للدراما في دورته الأولى اللي كانت يوم 21، والحدث الأهم بقى إن "كايروكي" نزلوا ألبومهم "روما" بعد 3 سنين على ألبوم "أبناء البطة السوداء".
