مع أول السنة، طرح تميم يونس أغنيته "سالمونيلا". واللي في وقت قليل جدًا عملت قلق على مواقع التواصل الاجتماعي، ووسائل الإعلام كمان. ما بين مؤيد ومعارض، أو حتى اللي سمعها ومش فارقة معاه. لحد ما الأمر وصل إن فيسبوك صنفها كمحتوى غير لائق.

بس وسط القلق ده كله، الأغنية هتلاقيها لازقة في دماغك ورايح جي بتدندنها. فقولنا نحاول كده نفتش ورا أسباب انتشارها بين الناس بالشكل ده، ووصلنا للآتي:

1- كاتشي وبتلزق في الدماغ

من أول ما تسمع الأغنية وانت هتلاقي نفسك بترددها تلقائي لوحدك. لأن الكلام نفسه صادم، وواقعي. أسلوب السهل الممتنع، بسيط جدًا وفي نفس الوقت يثبت في الدماغ مايطلعش.

2- دعاية ببلاش

الإغنية لما نزلت ماعجبتش البعض. والأمر وصل إن المجلس القومي للمرأة طلب من جوجل حذفها. بعد كده فيسبوك صنفها كمحتوى غير لائق. كل ده ساعد في انتشار الاغنية أكتر. وخلى اللي مايعرفهاش عرفها.

3- عسيلي كان مفاجأة

بتحب عسيلي أو بتكرهه، خلينا نعترف إن ظهوره في الكليب كان مفاجأة. والطريقة اللي ظهر بيها أصلًا تخليك تعيد الكليب مرة واتنين علشان تشوفه تاني. فطبيعي الأغنية تلزق في دماغك من كتر ما بتسمعها.

4- فيديوهات تقليد كتيرة

الأغنية من ساعة ما نزلت وكل شوية نلاقي حد عامل فيديو للأغنية، بس بكلمات وبطريقة مختلفة. من باب الضحك مش أكتر. وأشهر الفيديوهات دي كان:

- كليب "هبلونيلا"

- كليب "سندريلا"

5- الرقصة الغريبة

مافيش حد شاف الأغنية ماعلقش على الرقصة اللي فيها، وبدلة الكاراتيه. انت مش فاهم إيه اللي بيحصل، بس الموضوع بيضحك. ده غير الخناقة اللي قايمة طول الكليب.