أي بنت عايشة في مصر دايمًا بتواجه مشاكل وانتقادات وسط المجتمع. حاجات بتفرضها العادات والتقاليد اللي اتعودنا عليها، بغض النظر صح أو غلط. في منها انتقادات بيقدروا يتغلبوا عليها، لكن في انتقادات تانية لحد دلوقتي بتمثل لهم وحش مخيف.

تعالوا نتعرف على أبرز الانتقادات اللي لسه بتواجه البنت المصرية:

1- الاستقلال عن بيت الأهل

ممكن الولد يستقل عن أهله ويعيش لوحده عادي، إنما لو البنت عملت كده بتقوم الدنيا وماتقعدش. حتى لو بسبب ظروف الشغل لو مكان بعيد شوية عن البيت. ساعتها المضايقات هتبقى من كل اتجاه.

2- السفر لوحدها

الموضوع مش مقتصر على سفر الفسح والرحلات، في بنات بتتحرم من إنها تكمل تعليمها، لو الكلية اللي هتدرس فيها برة محافظتها. وده غالبًا بيكون بدافع الخوف عليها من الأهل. لكن لو حصل وسافرت، طبعًا بيكتر الكلام.

3- سواقة اسكوتر

البنت ممكن تسوق عربية أو تركب عجلة، لكن أول ما توسق اسكوتر الكل يستغرب. ويبقى يومها مش فايت لو وقفت في إشارة، النظرات بتبقى جاية من كل اتجاه. مع إن الموضوع حقيقي مش مستاهل.

4- شغلانات الرجالة

طبعًا الكلمة عنصرية حبتين. بس الفكرة إن في شغلانات اتعودنا إن بيشتغلها الرجالة زي: السباك - سواق الميكروباص - سواق التاكسي - الميكانيكي. فلو بنت اضطريتها الظروف تكون في شغلانة من دول، يبقى لازم تستعد لسلسلة من الاستجوابات والأسئلة.

5- الشخصية القوية

مش كل يوم بنقابل بنت شخصيتها قوية، وصاحبة قرار، وبتعرف تتعامل في كل المواقف. علشان كده البنت اللي بالمواصفات دي، دايمًا بيتقال عليها مقفلة. وماحدش بيحب يتعامل معاها. رغم إن ده أمر مايعيبهاش، ولا ينتقص من أنوثتها شيء. بس طبعًا هي مضطرة تواجه سيل من الانتقادات في حياتها مابينتهيش.