كل بنت ولها طريقه عشان تدخل قلبها. وهنا الموضوع بيحتاج مجهود شوية من الولد، علشان ينول الرضا ويكسب البنت اللي معجب بيها. بس خد بالك بقى يا معلم، في دخلات معينة ممكن تقفل البنت منك. فبلاش منها لو عايز تتعرف على واحدة. تعالوا نعرفهم واحدة واحدة:
- رسائل الـ"others" بلا حدود
في نوع كده من الشباب مجهول الهوية لو عجبته بنت، بيغرقلها مسدجات الـ others على فيسبوك حاجات من نوعية "صباح الخير على أجمل ملاك"، ومعاها وردة حمراء. وده مابيزهقش أبدًا. أي وقت تفتح المسدجات دي، هتلاقي رسالة عجيبة بعتها. وغالبًا مش ده النوع اللي معظم البنات بتدور عليه.
- لايك على أي شئ وكل شئ
أحيانًا في شاب بيكون خجول أو متردد شوية، إنه يصارح بنت بإعجابه. فتلاقيه مقضيها لايكات على كل بوست تنزله. ومفيش مانع لو كان بوست كوميدي، يعمل هو ريأكت لاف عشان يشد انتباهها. برضو الجو ده بيكون مفقوس بين البنات، خصوصًا لو مش مهتمة بيك، وهتتجاهلك أكتر.
- أنا شوفتك فين قبل كد؟
ياريت لو متعرفهاش فعلًا بلاش تقولها كده، لإنها هتحكم عليك إنك كذاب وده علشان البنات دايمًا بتحلل المواقف. واحتمال كبير ترفض تعرفك، لإنك دخلت بطريقه مش جذابة عكس ماكنت متوقع.
- تعالي نشرب كوفي
الثقة والحماس الزادة اللي بيسيطروا على بعض الشباب بتقفل البنات أكتر. زي لو كانت ماشية في الشارع وانت وقفت بعربيتك مهما كان نوعها، وعرضت عليها عزومة. مش هتقبل وهتسيبك وتمشي، لإن مش كل البنات مادية أو مستنية خروجة أو غدوة مع حد ماتعرفوش.
- متقمص شخصية عم حزومبل
ده اللي بيحاول يساعدها طول الوقت، من غير ما تطلب. لو اتكلمت قدامه عن حاجة بيجيبها، لو فكرت في مشوار أو خروجة بيرتبها. ممكن يجيب لها هدية من غير مناسبة. رغم لطافة الشخصية دي، لكنها بتكون مملة لبنات كتير. لإنها بتحتاج تعيش مغامرة مع الولد التقيل الراسي. وفكرة أنك تحققلها كل أحلامها طول الوقت، هتحسسها إنك غريب وفيك حاجه غلط.
