مترو الأنفاق هو أكبر وأسرع وسيلة موصلات في القاهرة. وبما إنه مش مُعرض للزحمة، فالإقبال عليه كبير بأعداد ضخمة. وحسب الإحصائيات الرسمية، في أكتر من 3 مليون شخص بيستخدموا المترو يوميًا. وبما إننا أزمة انتشار فيروس "كورونا"، فأكيد محتاجين نحمي نفسنا ونحافظ على صحتنا، لو بنستخدم المترو بشكل متكرر. اتكلمنا مع الدكتور أحمد عبد الحليم - طبيب بمستشفى الشيخ زايد التخصصي - علشان نعرف منه أهم إجراءات السلامة الصحة، وإحنا في عربيات المترو:

1- إذا كان صعب استخدام وسائل المواصلات الخاصة زي التاكسي أو النقل الذكي، يبقى يُفضل اختيار عربية في المترو مايكونش فيها تكدس وزحمة كبيرة. حتى لو هتستنى أكتر من قطار.

2- تجنب لمس أي شخص أو شيء نهائيًا، طول فترة وجودك في المترو. وبلاش تخلي وشك في وش أي حد، حتى لو كان باين إنه شخص سليم.

3- لو مضطر تلمس أي سطح  جوة عربية المترو، سواء باب أو مقابض أو شباك، فضروري يكون بمنديل ورقي. ويتم التخلص منه فورًا. واتجنب لمس الوجه بالأيد، لحد ما تعقمها بمطهر، أو تغسلها بالمياه والصابون.

4- البس كمامة N95، لإنها بتوفر حماية قوية من انتقال الأمراض. ولو مش متاحة، استخدم كمامة جراحية أو عادية. بشرط تكون مغطي الأنف والفم بشكل كامل.

5- لو لاحظت وجود أي شخص عليه أعراض أنفلوانزا، فممنوع تقرب منه نهائيًا. ويُنصح بالبعد مسافة 2 متر على الأقل. ولو أنتم مصابين بأي أعراض البرد بلاش تركبوا أي مواصلة عامة، حفاظًا على سلامتكم وسلامة الآخرين.