زي ما كل وقت وله أدان، كل و قت وله وظائفه. يعني من وقت للتاني الظروف بتفرض ظهور وظائف معينة، ماكانتش موجودة قبل كده. منها المهم والمفيد، ومنها اللي بصراحة يخلينا نضرب كف على كف. ونستغرب إنها بتدخل لأصحابها أحيانًا آلاف الدولارت شهريًا. وجو رزق الهبل على المجانين خالص. تعالوا نتعرف على شغلانات الجيل ده شكلها إيه:

فوتوجرافر

مانقصدش المصور المحترف، اللي بيحب التصوير وواخد كورسات وتعب سنين، علشان يوصل لمستواه. لكن بنتكلم على أي حد جاب كاميرا بروفيشنال، وأخد كام صورة لأربعة من صحابه، وحط عليهم لوجو باسمه. وطبعًا لازم يأكد ده بصورة لنفسه قدام المراية وهو بيصور نفسه.

إنفلونسر

دول أهم ناس يا جماعة، المعلمين، كبارات البلد. أغلبهم مانعرفش اتشهروا إزاي، بس فجأة لقيناهم موجودين على السوشيال ميديا، بفيديوهات غريبة مالهاش معنى. ممكن تلاقي واحد بيتكلم عن بواب العمارة وهو بيقوله صباح الخير، أو واحدة راحت حفلة ومانبسطتش. إيه يا جماعة في إيه بجد؟ لا وأي حاجة بيكتبوها على صفحاتهم بتجيب مع الناس، وتلاقي لايكات بالآلاف في دقيقة. 

ميكب أرتست

افتح الانستجرام هتلاقي ماسورة فيديوهات، لبنات بتعمل ميكب لنفسها (ميكب توتوريال)، أو بتعمل لبنات غيرها. هتحس إنك اتحشرت في علبة ميكب ومش عارف تخرج منها. الغريب إن وشوش البنات بقت كلها شبه بعضها، لإن طريقه وضع المكيب إلى حد كبير متكررة. بس هو ده اللي ماشي في السوق دلوقتي.

فاشونيستا

طويلة قصيرة تخينة رفيعة بيضا سمرا، مش فارقة. المهم إنك يكون عندك كام طقم ودافعة فاتورة النت، واخربيها على إنستجرام. الشغلانة دي بالذات بنات كتير مهووسة بيها، وطبعًا منهم اللي لعبت معاها وبقت مصدر دخل لا يستهان به. دي البنات الصغيرة لما بتتسأل نفسها تطلع إيه لما تكبر، بتقول "فاشونيستا". شغلانة حلوة ولذيذة مفهاش بصمة ولا ميتيج كل 3 دقايق. ده غير البراندات والمطاعم اللي بتتسابق، علشان تعرض منتجاتها على بيدجات الفاشونيستات.

التسويق الإلكتروني

تعرف كيو نت؟ أكيد عدى عليك السؤال ده قبل كده. جت فترة كده من الوقت وانتشرت شغلانة التسويق الشبكي دي. وكان كل المطلوب منك إنك تغامر بجزء من فلوسك في منتج ميعن، وتبدأ تقتنع اتنين بفكرتك، واتنين يجيبوا 4، وهكذا. والمفروض إن ده بيحقق لك فلوس خرافية، بس لحد النهارده ماشوفناش حد من اللي سألونا السؤال ده، حياته اتغيرت وبقى مليونير مثلًا.

وفي الآخر حابين نقولكوا لو عجبكوا المقال ماتنسوش تعملوا لايك وشير لصفحتنا على فيسبوك و إنستجرام  .