بدأت فعاليات معرض القاهرة الدولي للكتاب، في مركز مصر للمعارض الدولية بالتجمع الخامس. واتفتحت  أبوابه لعشاق القراءة علشان يستمتعوا بالوجبة الثقافية اللي ترضيهم. المعرض كالعادة مليان بأنواع مختلفة من الكتب والإصدرات الجديدة، ده غير المبادرات الثقافية والأنشطة الشبابية. اللي هتكون مستمرة لحد يوم 4 فبراير.

بس لو مشوار معرض الكتاب بعيد عليك. وانت شخص بتحب الكتب والقراءة، يبقى أفضل بديل ليك هو معرض سور الأزبكية. ليه بقى؟ ده اللي هنقول لك عليه في السطور الجاية:

1- المعرض موجود في العتبة، جنب المترو على طول. يعني مفيش بهدلة مواصلات، ووقت بيضيع في المشوار.

2- بيشارك فيه 133 بائع، يعني هتلاقي تنوع كبير في الكتب. اللي يخطر على بالك أكيد موجود.

3- أسعار الكتب رخيصة جدًا وفي متناول إيدك. يعني مش هتفلس بعد ما تشتري كتابين أو تلاتة.

4- فيه خصومات السنة دي 70 و80% على أسعار الكتب. يعني إما توفير أكتر أو كتب أكتر، انت وراحتك.

5- هتلاقي هناك كتب، قصص، مجلات، وثائق وصور، وتحف فنية وثقافية نادرة. صعب تلاقيها في مكان تاني. ودي أكتر حاجة مشهور بيها سور الأزبكية.

6- والأهم من ده كله، سور الأزبكية موجود طول السنة.