حذفت إدارة يوتيوب، أغنية "إنساي" للفنان محمد رمضان والفنان سعد لمجرد. وده بسبب حقوق الملكية للشركة المنتجة. الكليب اتعرض من حوالي 4 شهور، وكان محقق على يوتيوب أكتر من 170 مليون مشاهدة.

الخبر الحقيقة كان ملفت، فقولنا دي فرصة نتخيل كده كام سيناريو، يكونوا هم السبب ورا حذف الكليب:

1- محمد رمضان وسعد لمجرد اتخانقوا. سعد مصمم يقولوا في الأغنية "المعلم والأسطورة"، بدل "الأسطورة والمعلم". بس على مين؟ الأسطورة جابها من بابها.

2- بشرى لسه مقموصة من محمد رمضان، بسبب أغنية "مافيا". فأجرت هاكرز يمسحوا الأغنية. وزمانها أعدة بتضحك دلوقتي.

3- مخرج الأغنية قفش على محمد رمضان، لأنه رومى التليفون في الأغنية مش بيرد على حد. وسابه يرن يرن يرن.

4- سعد لمجرد اتضايق إن أغنية "السلطان" لمحمد رمضان، اتصدرت تريند يوتيوب. وأغنيته "سلام" ماكانتش بنفس القوة.

5- في احتمال يكون السبب هي براند "فرزاتشي". لما رمضان قال على الإسورة بتاعتهم (نيكلس) في مهرجان الجونة.

6- وإخيرًا بقى وارد يكون كل الجمهور العربي، ماعدا المغربي، عمل ريبورت للأغنية. لأن ماحدش كان فاهم حاجة من اللي كان بيقولها لمجرد في الأغنية.

تفتكروا في أسباب تانية لحذفها؟