في الساعات الأخيرة، رحل عن عالمنا الفنان الكبير يوسف شعبان عن عمر 90 سنة، بعد تدهور حالته الصحية بسبب إصابته بفيروس كورونا المستجد (كوفيد -19)، وبرحيله فقدت الدراما بشكل خاص والفن عمومَا نجم من طراز خاص، قدر يمتعنا على مدار سنين طويلة بموهبته وعشقه للفن. وعلشان كلنا بنحبه تعالوا نقرب أكتر من حياته:

1- ابن حي شبرا، اتولد في يوليو 1931 سنة، والده كان بيشتغل مصمم إعلانات في شركة أجنبية، وكان دايمًا بيجيب له المجلات والصحف والكتب، وده زود عنده الشغف بالقراءة والفنون.

2- حبه للتمثيل بدأ في طفولته، وكان بيشارك في مسرحيات المدرسة اللي بيقدمها الطلاب في المناسبات أو إجازة الصيف.

3 -درس في كلية الحقوق جامعة عين شمس، وهنا انضم لفريق المسرح بالجامعة، وخلال دراسته للحقوق، دخل المعهد العالي للفنون المسرحية، وشاف إن مستقبله في الفن، فقرر يستمر في المعهد ويسيب الكلية.

4- يوسف شعبان بدأ مشواره الفني من المسرح، بعدها شارك بأدوار صغيرة في أفلام، زي: "في بيتنا رجل" و"أيام بلا حب" و"المعجزة"، لحد ما جاتله الفرصة الحقيقية في فيلم "زقاق المدق".

5- قدم أفلام مهمة أبرزها "معبودة الجماهير"، "ميرامار"، "الثلاثة يحبونها"، "أم العروسة"، "كشف المستور"، "العذراء والعقرب".

6- أما في الدراما التلفزيونية، يوسف شعبان كان حضوره قوي جدًا، وقدم مسلسلات ناجحة لسه فاكرينها لحد النهارده، منها: "الشهد والدموع" بشخصية "حافظ رضوان"، "المال والبنون" في دور "سلامة فراويلة"، وطبعًا تألق في الأدوار الصعيدية والريفية زي ما شوفناه في مسلسل "الضوء الشارد" و"الوتد"، وبيعتبر دور "محسن ممتاز" اللي قدمه في مسلسل "رأفت الهجان" محطة فارقة في تاريخه الفني.

7- تولى منصب نقيب الممثلين دورتين متتاليتين من سنة 1997 لحد 2003 ، وحصل على جوائز كتير، وكرمه مهرجان الإسكندرية السينمائي لدول البحر المتوسط سنة 2016 والمهرجان القومي للمسرح المصري سنة 2019.