خلينا متفقين إن حياة الجامعة غير المدرسة خالص، في الشكل والمضمون. حتى أصحاب الجامعة ممكن يفضلوا معاك أكتر من أصحاب المدرسة. وبما إن الدراسة خلاص على الأبواب يا معلم، تعالى نقولك أنواع الطلبة اللي هتقابلهم علشان لما تروح متتفاجأش.

1- الدحيح

ده هيبقى معاك في مراحل تعليمك لحد ما تتخرج بالسلامة كده، وبرضو بيقعد في أول بنش. غالبًا لابس نظارة، وطبعًا هو الريفرنس لكل المحاضرات. ممكن تلاقيه كاتب الدكتور الفلاني طرد زميلك العلاني إمتي وليه وإزاي؟

2- الفنان

هتلاقيه رايح جاي بالجيتار مع إنه كلية تجارة قسم محاسبة بس عادي. ده هتلاقيه قاعد في وسط جروب معظمه بنات، وبيغني أغاني تامر حسني وحماقي.

3- المتأخر على طول

ده أساسًا لسه سامع إن الدراسة بدأت، وهيظهر فجأة بعد إسبوعين من بدايتها. حاول ماتعتمدش عليه لإنه هيسقط مواعيد ومحاضرات ماتعدش ياجيمي.

4- رئيس ملاك اتحاد الطلبة

ده بقا هيستلمك بما إنك مستجد، ويبدأ يعرفك على أنشطة الكلية والندوات والرحلات،. ماتستغربش لو لقيته بيقنع الدكتور نفسه بالاشتراك. وده لإن الاتحاد بالنسباله فكرة والفكرة لا تموت.

5- النعسان

على طول إما نايم أو بيحاول يفوق من النوم. يعني يادوبك كده يسلم عليك ويكمل الحلم عادي. مسالم وهيوافقك على أي حاجه تقولها له، بس تسيببه ياخد تعسيله قبل المحاضرة ما تخلص.

6- التلميذ النجيب

لسه خارج من امتحانات الثانوية العامة ومش عارف حاجة، وده بيحتاج وقت عشان يفصل ما بين نوع الدراسة هنا وهناك. طول الوقت بيراجع معاك الدكتور قال إيه وعمل إيه. غالبًا البنات بتكون مسيطرة أكثر في النوع ده.

7- الفاشونيستا

بنات ولاد كله موجود، ما هي بقت شغلانة الزمن ده. دول يامعلم عايشين في كوكب تاني وفاكرين إن الجامعة عرض أزياء كبير. كل يوم لون جديد واستايل جديد. وكل شوية سيلفي بـ pose مختلف.

8- سومة العاشق

أيوة زي ما قريت كده، هتلاقيه متأثر شوية بأغاني تامر عاشور ومحمد محيي القديمة. كائن رومانسي قلبه كبير، بيعشق كل البنات من أول نظرة. وبيتغذي على الحب والأشواق.

9- الأب الروحي  

ممكن يكون أقدم من عميد الكلية نفسه، وده لإنه بقاله 8 سنين ولا حاجه في سنة رابعة مثلًا. ده حبيب الكل وعارف كل شبر في الجامعة مش في الكلية بس. هتلاقيه بيحتويك كده وعارف طلبك من قبل ما تقول.

10- الباراشوت

ده مش معاك في الكلية أصلًا، بس مقيم عندك 24 ساعة. غالبًا عجباه البنات اللي في كليتك، وبيختار واحدة يظبطها. وهتلاقيه دايمًا بشوش أوي معاك، ماهو لازم يكسب رضاك علشان ماتقفلوش في المصلحة يا نجم.