كعادة كل سنة في رمضان، بيطل علينا الفنان رامز جلال بمقلب جديد في نجوم الفن والرياضة، والسنة دي -وبحسب ما تم نشره- البرنامج هيكون اسمه "رامز مريض نفسي"، وطبعًا تقدروا تتخيلوا فكرة البرنامج من اسمه. ومن بين الفنانين اللي اتسربت أخبار عن مشاركتهم في البرنامج، هو المطرب أحمد سعد، لكنه رفض تأكيد الأمر بشكل رسمي.

وقال "سعد" في تصريحات صحفية، إنه مايقدرش يقول بشكل رسمي إذا كان هيكون من ضحايا رامز السنة دي ولا لأ، واعتبر إن الإعلان عن الأمر هيكون عدم مهنية منه بحسب تعبيره، وأضاف في تصريح لكلام القاهرة: "خلوها مفاجأة أحسن".

جدير بالذكر إن رامز بيطلب بالفعل من كل المشاركين في البرنامج، عدم الإعلان عن الأمر علشان مايتمش حرق الفكرة. لكن الأكيد إن "سعد" سافر الأيام اللي فاتت السعودية، وهي مكان تصوير البرنامج، لكنه قال إنه كان رايح يعمل عمرة عادي واتبسط باليومين اللي قضاهم هناك.

وفي سياق متصل عرفنا في "كلام القاهرة" إن فيه كتير من نجوم الفن والرياضة صوروا فعًلا حلقاتهم في البرنامج، منهم: ويزو، سمية الخشاب، محمود عبد الرحيم "جنش" حارس مرمى نادي الزمالك، مروان محسن، أشرف بن شرقي، ونجوم أكتر.