في أيام الموجات شديدة الحرارة، طبيعي جدًا إن الضغط على الأجهزة الكهربائية بيزيد، وخصوصًا التكييفات، ومع تخفيف الأحمال وانقطاع الكهرباء لفترات طويلة الفترة دي، محتاجين نرشد استهلاك الكهرباء، إزاي ده يحصل؟ بص يا سيدي:

- مبدئيًا كده،غير لمبات الإضاءة العادية بلمبات فلورسنت أو لمبات موفرة للطاقة.

- قلل من اسخدام أجهزة التكيييف على قد ما تقدر، واضبطها على درجات حرارة ماتقلش عن 25 درجة مئوية. ولازم تكون الأبواب والشبابيك مقفولة.

- بشكل عام، لما تيجي تشتري جهاز كهربائي جديد، خدلك بصة على بطاقة كفاءة الطاقة. بتكون ملزوقة عليه. واتأكد إنه مصمم بطريقة موفرة للكهرباء (كلاس A). وفي نفس الوقت هيديك الكفاءة المطلوبة.

- استخدم اللاب توب بدل الديسك توب لأنه أقل في استهلاك الكهرباء.

- حاول في فترات النهار تعتمد على نور الشمس الطبيعي، وبلاش تشغل النور إلا في الضرورة. وبالليل، حاول تخلي الإضاءة على قدر حاجتك وبس.

- بلاش تستخدم أجهزة مختلفة في نفس الوقت، زي التليفزيون والمكواة والشواحن، وأدوات المطبخ. علشان ماتزودش الأحمال الكهربائية. وماتسيبش شاحن الموبايل في الفيشة بعد ماتخلص.

- أحيانًا بتكون المروحة كفاية لتلطيف الجو. ومفيش داعي للتكييف.

-ابعد الثلاجة عن البوتاجاز، لإن الحرارة بتزيد من استهلاك الثلاجة للكهرباء، والوضع يبكون حر أكتر.

- اقفل مفاتيح الكهرباء في لوحة التحكم الأساسية الموجودة في البيت أول ما الكهرباء تقطع، وارجع شغلها بعد عودة الكهرباء بدقيقة أو دقيقة ونصف.