"تعرف فلان؟ آه أعرفه .. شوفت هزاره؟ لا.. يبقي متعرفوش". مثل جديد المفروض نآمن به من النهارده. خصوصًا لما يتسبب الهزار في انفصال زوجين معداش على جوازهم غير 9 شهور بس. تعالوا نشوف إيه اللي حصل.

حسب تصريحاتها لموقع"الوطن". الحكاية ببساطة بدأت مع نورهان لما اتعرفت على شخص بالصدفة، وزي أي اتنين حصل بينهم إعجاب وبعدها زواج. الموضع لحد هنا عادي جداً، لكن اللي مش عادي أنها تصحى كل يوم على أصوات فرقعة بلالين وصواريخ في أوضة نومها. مش بس كده، لا ده كمان جوزها "غريب الأطوار". ساعات بتجيله نوبة ضحك هستيري مش بتوقف غير بعد وقت طويل. 

من هنا قررت الزوجة حديثة العهد أنها ترجع على بيت عيلتها من تاني، بعد ما يأست من أنها تعيش حياة عادية مع جوزها. وعشان تكون منصفة، حاولت مع والدته بأنها تنصحه جايز يسمع كلامها. لكنها تقريباً كده ارتاحت منه، وحاولت تقنع نورهان بالتعايش مع الهزار السخيف. وترضى بالأمر الواقع، وتستحمل بقى زحلقة الشاور جيل كل يوم وهي بتقوم من سريرها.

تقريباً كده دعوى الخلع اللي رفعتها نورهان ضد جوزها أمام محكمة الأسرة بالتجمع الخامس، هتكون من أغرب قضايا الخلع في الفترة الأخيرة. وده من كتر بساطة تفاصيلها، إلا أن فعلًا الشئ اللي بيزيد عن حده بيتقلب ضده.