ناس كتير بتتعرض للكراهية أو التنمر من اللي حواليها، سواء في المدرسة أو الشغل أو الجيم، وحتت تانية كتير. غالبًا بيكون بدون سبب واضح، لأن في ناس غاوية أذى كده وخلاص، ومضطرين نتعامل معاهم بحكم ظروف حياتنا اليومية. فلو بتقابل النوع ده في شغلك أو أي مكان، دي أحسن الطرق اللي ممكن تتعامل معاهم بيها:

التجاهل

أول سلاح تستخدمه في وجه أي حد بيحاول يقلل منك، أو كل ما يشوفك يعلق على شكلك أو شغلك بطريقه مش عجباك. لا ترد عليه ولا تهتم بكلامه. بكده انت بتحسسه إن كلامه مبيأثرش فيك ومن الأفضل الاحتفاظ برأيه فيك لنفسه.

الثقة في النفس

التجاهل مفيد كطريقة مواجهة للشخص المتنمر. لكن ضروي يكون عندك ثقة في نفسك كفاية، علشان الكلام ده مايأثرش فيك. وتكون متمسك باللي بتمعمله باقتناع وبدون أي تردد.

بلوك بلوك بلوك

المتنمر موجود برضو على مواقع التواصل الاجتماعي، وطبعًا مفيش أحسن من الحل السحري.. "البلوك". محتاجين نبعت جواب شكر لمؤسسين مواقع التواصل الاجتماعي، لإنهم قدموا لنا خدمة العمر، إننا نقدر نخرج أي شخص حقود أو كاره من حياتنا على السوشيال ميديا إلى الأبد.

المواجهة بشجاعة

مش كل الكارهين التجاهل بيكون مناسب معاهم، أحيانا المواجهة بتحط نهاية للموضوع بشكل حاسم. بص في عين منتقدك وواجهه بالكلام، خليك هادئ واختار ردودك بذكاء. وبكده انت بتصغره قدام نفسه، وبيكون مجبر إنه يوقف اللي بيعمله.

نجاحك أقوى سلاح

فوق كل الطرق اللي ممكن تواجه بيها أي متنمر، نجاحك في حاجة معينة هو قلل منك فيها، يعتبر أقوى سلاح وأقوى رد. اشتغل على نفسك في الحاجة اللي انت مميز فيها، وأكيد نجاحك حتى لو بسيط، هيضايق أي متنمر.

سامح لو قدرت

خليك متأكد إن مشاعر الكره بتتقلب على صاحبها، وأغلب اللي بيصدرلك المشاعر دي بيكون مش راضي عن نفسه. فلو حد كان بيضايقك وقرر في يوم إنه يتراجع عن ده ويبدأ معاك صفحة جديدة، سامحه وانسي اللي فات. وافتكر إن كلنا بنغلط، وممكن انت كمان تغلط وتحتاج اللي يسامحك.