بعد موجة متواصلة من الانتقادات ودعوات المقاطعة، ظهر الفنان محمد رمضان كضيف، مع الإعلامي وائل الإبراشي في برنامج "التاسعة". ودار نقاش عن كل القضايا اللي كان رمضان طرف فيها، وشغلت السوشيال ميديا طول الفترة اللي فاتت. ودي كانت أهم تصريحات محمد رمضان خلال اللقاء:
- مقاطعة أعمالي الفنية دي غريبة جدًا. والمقاطعين بيمثلوا نقطة في بحر جمهوري المحب، اللي بيهتم بالفن مش لتصرفات الشخص.
- أنا مستاء جدًا من الحكم القاسي على الطيار، زي كل الشعب المصري. بس أنا مش أول فنان يتصور في كابينة طيران، فنانين كتير اتصورا زيي بس علشان هما مش محمد رمضان مخدوش الضجة دي.
- كابتن الطيارة هو اللي عرض عليا اقعد جنبه في الكابينة. وبعد انتشار الفيديو، المحامي قالي إنه بيطلب 9.5 مليون جنيه تعويض، أو يتجه للسوشيال ميديا. رفضت علشان أنا ابن بلد ومبدفعش 10 جنيه بدون وجه حق.
- أنا تحت أمر الكابتن ولو يقبل أتكفل بالمرتب اللي كان بياخده، لحد ما يحصل على حكم في القضية الذي رفعها ضدي.
- بقدم نوع مزيكا موجود في العالم كله. وكل أغنية بتحتاج لبس معين لإن لبس "الميوزيكال شو" كده. والأزياء صدمت الناس علشان جديدة على الشعب المصري.
- جمهوري هو اللي فرضني في الغنا مش أنا، وأنا تحت أمره. وأنا المغني أو المؤدي الوحيد في مصر، اللي عنده 5 أغاني شافهم أكتر من 100 مليون. ونجاحهم ملحوظ.
- بحترم رأي الاستاذ هاني شاكر، ولو عنده اعتراض على حفلاتي ولبسي، مش هعمل حفلات في مصر. وعندي دول كتير أعمل فيها حفلات زي فرنسا والكويت والسعودية.
- مابحبش يكون فيه جدار بيني وبين جمهوري. والشخص اللي بتستفزه طريقتي في عرض ثروتي على السوشيال ميديا، ده شخص غلاوي وحسود مش عايزه في جمهوري.
- الحملة ضدي على السوشيال ميديا ممنهجة جدًا. وأنا من أول ظهوري وفي ناس ضد نجاحي.
- ماعنديش عقدة من عادل إمام، بالعكس هو مدرسة. وشرف ليا أقدم مسرحيات على مسرح الزعيم. أنا واحد من تلاميذه ودخلت التمثيل بسبب عشقي له، ومفيش أي مشاكل بينا
- أفلامي متنوعة وحققت نجاح كبير في سن صغير، ولسه عندي كتير مقدمتوش. فبلاش نحكم على لوحة لسه مكتملتش.
