في حالة انتشار أي وباء أو مرض، الناس بتحس بالخوف بسهولة. ممكن يوهموا نفسهم بالإصابة، وياخدوا إجراءات مش متأكدين من صحتها. علشان كده هنقول لكم على أهم الإجراءات العامة، اللي تحميكم من أي وباء. حسب ما نشر "برايت سايد":

1- أي فرد مريض من العيلة يفضل في البيت 

أحد أسباب انتشار الأمراض خلال الشتا، هو أن برودة الجو بتخلي الناس يقعدوا مع بعض، في أماكن مقفولة وصغيرة. وده بيساعد الفيروسات تنتشر أسرع. فلو انت أو حد من عيلتك، ظهرت عليه علامات المرض، لازم يتجنب الخروج في الأماكن العامة. أما في الحالات الصعبة، ضروري جدًا وضع المرضى في الحجر الصحي وعزلهم.

2- تناوُل الدواء قبل ظهور الأعراض

لو حد بيعاني من أمراض صدرية زي الربو أو الحساسية، يُفضل إنه يسأل الدكتور المختص، عن إمكانية تناول الدوا قبل ظهور الأعراض. علشان تساعد في تقليل خطر الإصابة بالمرض.

3- تطهير الحاجات اللي بنستخدمها طول الوقت

زي ما بنتجنب التواصل المباشر مع الأشخاص المصابين بمرض، لازم نعقم الحاجات اللي بنلمسها باستمرار خلال اليوم، سواء في البيت أو الشغل. وبالطريقة دي هنتجنب انتقال العدوى لينا، لو شخص تاني استخدمها.

4- طهي الأكل كويس جدًا

فيه أطعمة بتحتوي على بكتيريا سامة، ممكن تسبب أمراض للناس سواء بأكلها أو لمسها، لو ماتمش طهيها كويس. أغلب الأطعمة خاصة اللحوم، الدواجن، الأسماك، والبيض، ضروري طهيها بشكل صحيح. علشان يتم قتل البكتيريا والميكروبات اللي فيها. عادة يُفضل طهي الطعام عند درجة حرارة 75 مئوية، أو أكثر. وأكله على درجة 60 مئوية.

5- تجنب التواصل مع الحيوانات

الحيوانات ممكن تحمل جراثيم خطيرة، تسبب أمراض مختلفة للبشر. واللي بتنتقل بسهولة عن طريق اللمس، العض، أو حتى التواجد معاهم في نفس المكان. فإذا كان لا بد من الاختلاط بيهم، لازم تغسل إيدك بعد التعامل معهم، مع أدواتهم، أو التواجد في مكانهم.

6- عدم مشاركة المتعلقات الشخصية

زي الفوطة، فرشة الأسنان، أدوات الأكل، وغيرهم من المتعلقات الشخصية. تجنب تمامًا مشاركة استخدامها مع أي حد، خاصة في حالة انتشار مرض.

7- شُرب السوائل باستمرار

لما بتكون مريض، استهلاك جسمك للسوائل الموجودة فيه بيزيد عن المعتاد. وممكن تصاب بالجفاف من غير ما تحس. فلازم تشرب حوالي 8 أكواب من السوائل يوميًا، سواء المياه - عصير الفواكه - اللبن - القهوة منزوعة الكافيين. وابعد عن المشروبات السكرية أو اللي بتحتوي على الكافيين.

8- غسل الإيد باستمرار

طول الوقت وإحنا في الشغل أو الأماكن العامة، بنلمس بإيدنا أسطح مختلفة. واللي ممكن تكون مكان لانتشار الجراثيم. فضروري نغسل إيدينا باستمرار، أو نستعمل مطهر الإيد.

9- الاستخدام  الصحيح للكمامة

لازم ناخد بالنا من كزا نقطة في موضوع الكمامة، أولًا المفروض يلبسها الأشخاص اللي ظهرت عليهم علامات المرض، مش الأصحاء. وده لتقليل انتشار الأمراض المحتملة.

كمان الكمامة مهمة بشكل خاص للي شغالين في مجال الرعاية الصحية، اللي بياخدوا بالهم من الأشاخص المصابين. وضروري جدًا نعرف إن الجزء الملون، هو اللي يكون من برة، والأبيض جوة. علشان نقدر نستخدم الفلتر الموجود فيها صح.