زي النهارده من 33 سنة، 3 مايو 1987، رحلت عن عالمنا الفنانة العالمية داليدا. اللي سحرت بصوتها كل المعجبين في مصر والعالم. فنانة استثنائية في جمالها وكمان صوتها. وصنعت بمشوارها الفني اسم هيفضل عايش معانا طول العمر. تعالوا نتعرف أكتر على داليدا:
- اتولدت في حي شبرا مصر في 17 يناير سنة 1933. ووالدها كان عازف بأوركسترا دار الأوبرا.
- أسرتها من أصول إيطالية، واسمها الحقيقي يولاندا كريستينا جيجليوتي.
- سنة 1954 فازت بلقب ملكة جمال مصر. ودخلت مجال الفن كممثلة، بعد ما اختارت لنفسها اسم "دليلة". وشاركت في أفلام زي (قناع توت عنخ آمون - الكاس والسيجارة) بأدوار صغيرة.
- سافرت باريس واكتشفت إن موهبتها الحقيقة في الغنا. غيرت اسمها للمرة التانية لـ "داليدا"، وطرحت أول اسطوانة غنائية لها سنة 1956.
- لها حوالي 500 أغنية، وغنت بـ 9 لغات منها: العربية - الإيطالية - العبرية - الفرنسية - اليونانية.
- كانت من أوائل المغنيين اللي صورا أغانيهم على طريقه الفيديو كليب، سنة 1978.
- قدمت 12 فيلم سينمائي من أشهرهم "اليوم السادس"، للمخرج يوسف شاهين.
- عاشت أكتر من تجربة عاطفية فاشلة، اتسببت في إصابتها بالإكتئاب. وانتهت برحيلها عن عاملنا زي النهارده.
- بعد وفاتها كرمتها الحكومة الفرنسية بوضع صورتها على طابع بريد، واتعمل لها تمثال بحجمها الطبيعي على قبرها سنة 2001.
