لو بصيت حواليك، أكيد هتلاقي حد بيتكلم في التليفون، ومش بعيد يكون أنت بتفكر تعمل مكالمة دلوقت، لحد هنا الأمر عادي! اللي مش عادي ويخلينا نفكر مرتين، أن المكالمات الهاتفية ممكن تزود الإصابة بارتفاع ضغط الدم أو أمراض القلب، حسب دراسة بريطانية حديثة.

الباحثين اكتشفوا إن الأشخاص اللي أعمارهم بين 37 و73 سنة، استخدامهم اليومي للهواتف خاصة في المكالمات، بتأثر بشكل مباشر وخطير على صحتهم.

والغريب إنهم حددوا عدد الدقائق اللي بيقضيها الفرد في المكالمات مع نسبة الإصابة المتوقعة بارتفاع ضغط الدم.

ولقوا إن الأشخاص اللي بيتكلموا لمدة 30 دقيقة أو أكثر في الأسبوع، معرضين للإصابة بنسبة 12 %، واللي بيتكلموا أكثر من 6 ساعات أسبوعيًا بتزيد خطر الإصابة بضغط الدم عندهم بنسبة 25 %، وبشكل عام مستخدمين الهاتف معرضين لخطر الإصابة بنسبة 7%، مقارنة بغيرهم اللي استخدامهم للهاتف بيكون على فترات متباعدة.

وأكد الباحثين إن موجات الراديو الخارجة من الهواتف، هي السبب الرئيسي وراء الإصابة بالأمراض، ونصحوا بتقليل المكالمات الهاتفية بأكبر قدر ممكن.