النهارده، 21 مايو، اليوم العالمي للشاي. المشروب الرسمي المصري، اللي بيمدنا بجرعة سعادة يومية من غير مجهود، ده من حبنا فيه، بقى جزء من تراثنا الفني في أكتر من أغنية، وتقريبًا كده هتلاقيه في معظم الدراما الصعيدية.
وبالمناسبة دي، تعالوا ندردش مع بعض عن فوائد كوباية الشاي ممكن نكون مش واخدين بالنا منها:
بتقف معاك وقت الزنقة
بيزق معانا اليوم، السند. الحقيقي في انتكاسات البال لو مش رايق، وصديق الأزمات المزاجية المفاجئة، ياسيدي أنت لو جالك ضيف ومش عارف تقدمله إيه، تلقائي هتقوله اعملك شاي؟
كوباية الشاي باللبن بتغسلنا من جوه
نص طبطبة العالم في كوباية الشاي بلبن المظبوطة، تكيفك وتحسسك إنك خلاص مش محتاج حاجة من الدنيا، لو سقيت فيها قطعة كيك أو بقسماط، أنت كده برنس زمانك.
بتلهمك لحل المشاكل
كام مرة كنت محتار وهاري نفسك أوفر ثينكنج، ولما قومت عملت كوباية شاي، لاقيت السكك كلها اتفتحت قدامك، الشاي عنده سحر عجيب في حل المشاكل ولا أجدعها لايف كوتش من بتوع اليومين دول.
المشروب الرسمي لأي لمة
الشاي بيلم مبيفرقش، جملة "تعالى اشرب شاي" لوحدها بتحل خصومات وصلت لحيط سد، أهلينا في الصعيد ومطروح، عندهم طقوس معينة لشرب الشاي، أولها اللمة.
بيغير من نفسه علشان يرضيك
المفروض الشاي يتشرب في فنجان، لكن إحنا قررنا نشربه في كوباية، وبصراحة بتظبط المزاج أكتر، الشاي كمان مبقاش بالنعناع بس، عندك دلوقتي شاي الفواكة لأ وكمان شاي الكاكاو.
