حالة من الجدل سببها برومو فيلم "الملحد" بطولة أحمد حاتم المقرر طرحه في السينمات 14 أغسطس الخاص.
وانقسمت الآراء لفريقين فريق معارض لكل الأعمال مؤلف الفيلم الكاتب إبراهيم عيسى بشكل عام وللفيلم بشكل خاص، وكانت وجهة نظرهم إن فكرة الفيلم غير مناسبة للمجتمع المصري، وفريق تاني شايف إن الحكم على الفيلم قبل عرضه مش منطقي.
علشان كده في "كلام القاهرة" قولنا ندردش معاكم في أعمال قصتها صدمت الجمهور المصري، يالا نفتكرها:
أصحاب ولا أعز
واجه الفيلم انتقادات عنيفة وقت طرحه في 2022، خاصة إنه عرض قضايا في المجتمعات العربية، ولو فاكرين تعرضت منى زكي لأكبر قدر من الهجوم قوي بسبب مشهد تم وصفه بـ "الجرىء"، تسبب في كسر الصورة الذهنية للفنانة عند المشاهدين.
بحب السيما
سنة 2004، تسبب فيلم "بحب السيما" في غضب عدد من الأقباط، واعتبروا بعض مشاهده إزدراء للطائفة الأرثوذكسية، وصل الأمر للقضاء اللي رفض دعاوى قضائية تطالب بمنع عرضه.
عمارة يعقوبيان
من الأفلام اللي كانت عكس التيار، مشاهده صدمت عدد من الجمهور لدرجة إن البعض منهم كانوا مابيكملوش مشاهدة الفيلم وبيخرجوا من صالات السينما منزعجين، لكنه نال جوائز من مهرجانات عالمية بعد عرضه الأول سنة 2006.
أسرار البنات
أكتر من قضية حساسة ناقشها الفيلم، بداية من العلاقات العاطفية في سن المراهقة مع الغياب التام لمراقبة الأهل، وصولاً لقضية ختان الإناث، الفيلم كان مستوحى من قصة حقيقية ولكنه كان مفاجأة خاصة للأهالي.
لمؤاخذة
تعرض مؤلف ومخرج الفيلم عمرو سلامة، لانتقادات لاذعة واتهامات بالتحريض على العنصرية الدينية، خاصة إن الفيلم بيقوم على معاناة طفل بيخفي ديانته خوفًا من الإضطهاد من وجهة نظر طفولية بحتة.
