عارف فيديوهات غسيل السجاد وغيرها، اللي بتتفرج عليها بلا هدف، وفاكر إنك كده بتسلي وقتك، اكتشفوا إنها بتزود الإحساس بالملل أكتر، طبعًا أنت دلوقتي مستغرب، وندمان على فلوس الباقة، تعالا نقولك إيه الحكاية، حسب دراسة حديثة.

الباحثين اكتشفوا إن التبديل المتكرر بين مقاطع الفيديو أو حتى تخطي بعض الفيديوهات، ممكن يزود الشعور بالملل، على العكس الاعتقاد المعروف، طيب ليه؟

بيقول العلماء إن الانتباه مرتبط بالملل، يعني كل ما كان انتباهك عالي إحساس الملل بيقل، والعكس، فا فكرة إنك تقلب في الفيديوهات بسرعة من فيديو للتاني، معناه إنك مش متفاعل معاها، ومحتواها مالفتش انتباهك، بالتالي هتحس بملل أكتر.

وبينصح القائمين على الدرسة في جامعة بكندا، بمشاهدة محتوى الفيديوهات للآخر والاستمتاع بيها، بدل من التقليب المستمر.