الفنانة سلوى محمد علي فجّرت جدل واسع على السوشيال ميديا بعد تصريحاتها الأخيرة عن الفنان الكبير عادل إمام في حوار صحفي، قالت سلوى: "الرسالة في العمل الفني مبتخلهوش دمه خفيف، وأنا مش شايفة إن عادل إمام قدّم رسائل واضحة في معظم أعماله، رغم إنه الزعيم وأكبر فنان بيتكلم بالعربية، عنده أفلام عظيمة، بس الرسائل مش موجودة فيها".

وضربت مثال: "فيلم زي خلي بالك من زوزو، إيه الرسالة فيه؟ ومع ذلك هو من أجمل الأفلام، حتى في السينما العالمية، فيلم زي الأب الروحي، الرسالة إيه؟ إن الناس تعمل عصابات؟ العمل الفني هدفه يسلي الجمهورويفصلهم عن الواقع".

التصريحات دي خلّت سلوى في مواجهة انتقادات كبيرة من جمهور الزعيم، اللي شايف إن أعماله مش بس للضحك، لكنها بتناقش قضايا اجتماعية وسياسية مهمة، زي أفلام "الإرهاب والكباب" و"سلام ياصاحبي"، اللي بيعتبرها الجمهور من أكتر الأفلام اللي ليها رسائل هادفة.

الجدل حوالين تصريحات سلوى فتح باب للنقاش عن دور الفن، وهل كل عمل لازم يكون عنده رسالة واضحة؟ ولا الترفيه والتسلية كفاية؟ خصوصًا إن الكوميديا دورها الأساسي تخفيف الضغوط عن الجمهور.

حابيين نأكد إن عادل إمام ما زال رمز من رموز السينما العربية، كان آخر أعماله  مسلسل "فلانتينو" سنة 2018، وفي نفس الوقت، ابنه المخرج رامي إمام نفى شائعات اعتزال الزعيم، وأكد إنه ممكن يرجع للشاشة لو لقى الدور المناسب.