نجح فريق طبي في مستشفى الباطنة بجامعة المنصورة في استخراج موبايل من معدة سجين باستخدام المنظار ومن غير جراحة، بعد ما بلعه من 6 سنين!

الموبايل كان ثابت في معدته طول السنين دي وسبب له مضاعفات خطيرة وفقدان وزن بشكل كبير.

السجين، اللي بيقضي مؤبد في سجن جمصة، وصل المستشفى وهو في حالة سيئة، وبعد الفحوصات والأشعة اكتشفوا إن الموبايل لسه موجود في معدته، وده خلاه يعاني من التهابات حادة وقرح، وكمان فقد أكتر من 30 كيلو من وزنه، لحد ما بقى في حالة هزال شديد.

الفريق الطبي قرر التدخل فورًا باستخدام المنظار بدل الجراحة، والعملية نجحت في 45 دقيقة بس!

وأكدت الدكتورة أسماء جميل  أخد الأطباء المشاركين في العملية، إن المريض خرج من المستشفى بعد العملية وهو بحالة جيدة، وأوضحت إن الموبايل كان ملفوف في كيس بلاستيك، وفضل في معدته 6 سنين، وده خلاه يتفاعل مع عصارة المعدة، وسبب له التهابات خطيرة ومضاعفات قوية، أدت إلى فقدانه 30 كيلو من وزنه.

وأضافت إن الحالة دي نادرة جدًا، والأغرب إن بطارية الموبايل ما انفجرتش طول الفترة دي، رغم إنهم حاولوا كتير يخرجوه قبل كده لكن كل المحاولات فشلت.