رغم مؤشرات نجاح مسلسل "أشغال شقة جدًا"، لكن ده ما منعش انتقاد بعض تفاصيله، زي صورة مهنة الطب الشرعي، والاتهامات بالتنمر والعنصرية، وكمان الجدل حوالين صورة الست في المسلسل؛ تعالوا نفهم أكتر في السطور الجاية…
الاتهام الأول كان في تقديم شخصية خادمة نيجيرية بطريقة مهينة لأصحاب البشرة السمراء، واللي جسدتها الممثلة السودانية إسلام مبارك، وظهرت وكأنها عندها شراهة في الطعام.
أما الاتهام الثاني، فكان متعلق بتشويه صورة المرأة المصرية، وده تجسد في شخصية نسائية بتعترف بإقامة علاقات غير شرعية كتير، لدرجة أنها خلفت طفل مجهول النسب.
وكان الاتهام الثالث متعلق بتقديم صورة غير دقيقة عن طبيعة مهنة الطبيب الشرعي، واللي ظهر بيفحص أموال مزيفة، وده مش من مهام وظيفته أصلًا، ولكن من اختصاص خبراء أبحاث التزييف والتزوير.
هشام ماجد أكد إن فريق العمل ماكانش يقصد يسيء لأي حد، وإنهم دايمًا بيحرصوا على تقديم محتوى كوميدي يناسب كل أفراد العيلة، وقال: "إحنا بنحاول طول الوقت نتجنب أي إساءة، ومافيش أي حاجة في المسلسل عنصرية أو ممكن تجرح حد".
وكمان اعتذر بالنيابة عن فريق العمل لو أي حد حس بالإساءة من بعض المشاهد أو الشخصيات، وأكد إنهم هياخدوا التفاصيل دي في اعتبارهم بعد كده.
وعن إمكانية تقديم جزء تالت، قال: "الحقيقة إحنا استهلكنا أفكار كوميدية كتير في الجزء التاني، واتعبنا فيه جدًا، فالتفكير في جزء تالت محتاج دراسة كويسة. لو ملقيناش فكرة قوية وجديدة، الأفضل إننا مانعملوش، عشان مانقدمش حاجة أقل من اللي فات".
من تصريحاته هشام ماجد لـ قناة "العربية"
