في أسبوع واحد بس، الداخلية نفذت حملة كبيرة ضد صناع محتوى على تيك توك، واتقبض على أسماء معروفة بسبب فيديوهات واتهامات بتسيء للقيم والعادات والتربح من محتوى "غير لائق".
مين اللي اتقبض عليهم؟
سوزي الأردنية
اتقبض عليها من شقتها في القاهرة الجديدة، بعد ما طلع ضدها بلاغات بسبب فيديو مسئ للرسول، وفيديوهات فيها إيحاءات وكلام غير لائق، الجهات المختصة تحفظت على موبايلاتها وبتفحصها حاليًا.
مداهم (محمد خالد)
اتقبض عليه في القليوبية، وكان معاه مخدرات وذهب ومبالغ مالية كبيرة، واعترف إنه بيكسب من فيديوهات فيها تجاوزات علشان المشاهدات والإعلانات.
شاكر محظور دلوقتي
اتقبض عليهم من كافيه في القاهرة الجديدة بعد ما كانوا طالعين لايف بينكروا فيه أي قضايا ضدهم، الأمن أخد موبايلاته وبيتم فحصها دلوقتي.
أم سجدة وأم مكة
الاتنين اتقبض عليهم بسبب فيديوهات بيقولوا إنها "لا تليق بالقيم الأسرية" وبتتجاوز حدود المحتوى المقبول.
قمر الوكالة
بعد ما حققت شهرة واسعة بسبب بيع منتجات مجهولة المصدر، تم اتهاماها بنشر فيديوهات خادشة للحياء.
المحامي أشرف فرحات هو اللي بدأ الحملة دي ببلاغات للنيابة، وقال إن الهدف مش الأشخاص، لكن المحتوى اللي بيأثر على الوعي العام وبيشجع على الربح من حاجات "مش محترمة"، على حسب وصفه.
النائب أحمد بدوي أعلن إن في مهلة ٦٥ يوم قدام منصة تيك توك علشان توفّق أوضاعها القانونية في مصر، ولو ما استجابتش ممكن يتقفل التطبيق نهائي.
كل اللي اتقبض عليهم، موبايلاتهم دلوقتي بتتراجع فنيًا، ولو طلع فيها فيديوهات أو معلومات جديدة، ممكن يطلع منها متهمين جداد أو تتوسع القضية أكتر.
وسببت حملة القبض دي، ردود فعل متباينة بين الناس، منهم اللي شايف إنهم بيقدموا محتوى مسئ للقيم المجتمعية في مصر، ومنهم اللي بيقول إنه من حقهم يعبروا عن نفسهم على المنصات المختلفة.
