النهارده بتعدي ٤ سنين على رحيل الفنانة دلال عبد العزيز، اللي سابت بصمة كبيرة في قلوب جمهورها بأدوارها وإنسانيتها، واللي رغم فراقها، محبتها لسه عايشة في قلوبنا.

وعلشان عمرنا ما هننساها، تعالوا نعرف 5 حاجات خلونا نقع في غرامها ونحبها.

فنانة بدرجة أم

صحيح قدمت أدوار ماتتنسيش، زي "نجاة" في "ليالي الحلمية" و"نعمة" في "حديث الصباح والمساء"، لكن تجسيدها لدور الأم ماكنش بيمر عادي، الكل كان بيشوف أمه فيها، ما هي نفس طريقه الكلام والهزار وحتى الخوف والزعل.

صنعت أسرة مش عادية

في حوارات تليفزيونية وصحفية كتير، قال الفنان الكوميدي الراحل سمير غانم، إن دلال هي اللي اقنعته بفكرة الجواز، بعد ما كان سنه وصل للأربعينات ورافض الارتباط ومركز في فنه وبس، ورغم فرق السن بينهم، لكنها كانت جوازة ناجحه خرجت أسرة فنية استثنائية، ويمكن سابولنا إيمي ودنيا علشان نفضل فاكرينهم.

محبوبة من الكل

من الفنانات اللي صعب تلاقي حد مابيحباهاش، كلامها دايمًا لطيف، دعواتها وأمنياتها بالخير للكل مابتفارقش لسانها، حقيقي قدوة مش هتتعوض.

سباقه في الخير

دلال ماكنتش بتتأخر عن واجب أو مساعدة أو دعم مادي أو معنوي، سواء لحد من زملائها في الوسط أو خارجه، معظم الفنانين شاهدين على مواقف إنسانية كانت دلال "البطل" فيها، طول الوقت شايله هم اللي حواليها وعايزاهم مبسوطين.

سبحتها الحمراء

"لو نسيتها أحس إن هيجرالي حاجة"، ده كان ردها على الفنان أمير كرارة لما سألها في برنامجه أيه سر السبحة الحمراء اللي معاها، وحكت تاريخ ارتباطها بالسبحة اللي بيرجع لأكثر من 25 سنة، بعد نجاحها في أول بطولة تليفزيونية ليها وهي مسلسل "لا"، ومن وقتها والسبحة مابتفارقهاش في كل مكان بتروحه حتى وهي بتصور.