المطرب الشعبي إسماعيل الليثي مازال في غيبوبة بعد الحادث المروع اللي حصل له على طريق المنيا قبل أيام، وده حسب ما أكده مصطفى كامل نقيب المهن الموسيقية في تصريحاته الأخيرة، لما قال إن "الليثي مازال بين أيادي الله"، وإنه ما حصلش أي تحسن في حالته الصحية زي ما الناس كانت متصورة.
الحادث حصل لما الليثي كان راجع من حفلة في محافظة المنيا، والعربية اللي كان راكبها اتعرضت لحادث كبير، تسبب في إصابته هو وعدد من اللي كانوا معاه، واتنقل بعدها فورًا لـ مستشفى ملوي التخصصي.
أسرة المطرب نفت كل الشائعات اللي طلعت عن وفاته، وأكدت إنه لسه على قيد الحياة، ومحجوز في المستشفى تحت الرعاية الطبية، وإنهم متابعين حالته لحظة بلحظة، كمان طلبوا من الجمهور الدعاء له بالشفا بدل نشر أخبار مغلوطة بتسبب ألم ليهم.
النيابة فتحت تحقيق في الحادث، وبتتابع تفاصيل الواقعة لمعرفة أسبابه وملابساته، خصوصًا بعد إصابة أكتر من شخص كانوا موجودين مع الليثي وقت الحادث.
